Kom vra self vir Faffa by Agri-Expo Livestock
DIE lewendehawebedryf word vanjaar weer uit alle hoeke beskou op die jaarlikse Agri-Expo Livestock, wat van 11 tot 13 Oktober by Sandringham buite Stellenbosch aangebied word.
’n Aantal leiers in die veebedryf kom dra hul kennis gratis oor op die Vleisbees-inligtingsdag. Die bekende veearts dr. Faffa Malan, skrywer van Landbouweekblad se gewilde Vra vir Faffa en voorsitter van die Herkouerveterinêre Vereniging, is ’n spreker by beide die vleisbeesen melkbok-inligtingsdag. Hy kom stel ook sy verbeterde Vra vir Faffa-portaal as deel van die nuwe kundiges-afdeling op Landbou.com bekend, en sal enige belangstellendes by die Landbouweekblad-stalletjie te woord staan. Die bekroonde Oos-Vrystaatse vleisbeesteler mnr. Llewellyn Angus, verlede jaar se wenner in die Landbounavorsingsraad se kompetisie vir die Nasionale Vleisbeesverbeteringskudde van die Jaar, praat oor die basiese beginsels van ’n suksesvolle vleisbeesboerdery. Dr. Vlok Ferreira, tegniese bestuurder by RCL Foods en ’n kenner oor herkouervoeding en -bestuurstelsels, gee raad oor korrekte voedingsbestuur by koeie en verse. Mnr. Willie Clack, die nasionale voorsitter van die Veediefstalvoorkomingsforum en tweede ondervoorsitter van die Rooivleisprodusente-organisasie (RPO), praat oor die rol van die boer as beskermheer in veediefstalvoorkoming.
SKAAPHONDE
’n Veiling van werkende skaaphonde vind vir die tweede agtereenvolgende jaar op dié ekspo plaas ná die eerste een in meer as 30 jaar verlede jaar hier aangebied is.
Mnr. WA Hugo, skaaphond- afrigter van Lambertsbaai, sê die voordeel van die veiling is dat die honde reeds afgerig is en dadelik deel kan word van ’n veeboer se werksmag. Daar is van Donderdag tot voor die veiling op Vrydag deurlopende demonstrasies waar hanteerders sal verduidelik wat van ’n skaaphond verwag word, en kenners is ook by die Suid-Afrikaanse Skaaphondvereniging se stalletjie beskikbaar.
Sowat 2 500 skoolkinders sal die plaaslewe van nader leer ken danksy ’n dinamiese opvoedkundige program. Kinders kan die ekspo ook saam met hul ouers besoek – toegang is vir hulle gratis op Donderdag en Vrydag, en daar is meer as 300 verskillende plaasdiere, ’n troetelplaas en skou vir hase.
Vir nog inligting besoek www. diegrootplaasproe.co.za of volg Die Groot Plaasproe op Facebook, Instagram of Twitter.