LEIERBOERE LEER ÉLKE JAAR BY ALDAM-VEESKOOL
VAN Suider-Afrika se voorste veeboere is dit eens dat elke Veeskool waardevolle inligting vir veeboere bied wat hulle prakties kan toepas om hul boerderye te verbeter. Mnr. Mecki Schneider, Brahmanboer van Grootfontein in Namibië en ’n voormalige Suider-Afrikaanse Stoetteler van die Jaar, het nog elke jaar die Veeskool bygewoon en gaan vanjaar die tiende keer daar wees. Hy sê hy weet uit ondervinding hy gaan wéér sinvolle inligting plaas toe neem wat hy in sy boerdery kan toepas.
Die laaste vyf skole het gefokusde temas gehad, en Schneider sê een van die Veeskole wat op die nuutste tegnologie vir presisieboerdery toegespits was, het hom ’n hupstoot gegee om sy koeikudde te verbeter.
’n Ander jaar is op netto voerinname gekonsentreer en daarna het hy en mnr. Ebbi Fischer hul eie voertoetsstasie begin. Die voordele van genomika is herhaaldelik bespreek en Schneider is nou méér op die invloed van genomika op sy boerdery toegespits. Mnr. Christopher Sparks, Brangusteler van Harrismith en vorige voorsitter van die LRF, sê die Veeskool het hom al onder meer bewus gemaak van die waarde van inligting, die feit dat ’n mooi bees nie noodwendig ’n goeie bees is nie en dat die veebedryf in die toekoms meer vleis op die bestaande oppervlakte grond moet produseer om die groeiende wêreldbevolking te kan voed.
“Ons moet ook waarde tot ons produk se eetervaring toevoeg as ons enigsins meer geld vir ons produk wil vra,” sê hy. Mnr. Llewellyn Angus, Simmentaler-, Simbra- en Merinoteler van Arlington, sê hy leer baie op elke Veeskool wat hy bywoon. “Norme vir verskeie eienskappe, soos vrugbaarheid en groei, verskuif gereeld. Met genomika wat nou inskop en nuwe bevindings in verwante bedrywe, soos weiding en voeding, kry ek elke keer nuwe inligting en perspektiewe. Dit kan ook prakties op die plaas toegepas word. Selfs by bul- en versseleksie waarby ek gewoonlik betrokke is, kom nuwe inligting na vore wat aan boere oorgedra moet word.”
GEMIK OP PRODUKSIE
Die Veeskool konsentreer vanjaar op reproduksie met sy twee komponente, naamlik nuwe reproduksietegnologie wat onder meer embrio’s, selverdeling en geslagbepaling van semen behels, en die produksiefasette wat met reproduksie gepaardgaan. Wêreldkenners uit Kanada, Amerika en Suid-Afrika tree op. Die Veeskool vind van 17 tot
19 Oktober die tiende keer by die Allemanskraal-vakansieoord tussen Ventersburg en Winburg plaas. Besoek bit.ly/2oZfqaM vir die volledige program, asook inligting oor hoe om te registreer.
–