Dié onsekerheid verlam
HY het nog nooit boere só onseker soos nou gesien nie. Dit is ongesond en in sommige gebiede selfs heeltemal irrasioneel, sê mnr. Dan Kriek, voorsitter van Agri SA.
Hy sê Suid-Afrika is steeds ’n netto uitvoerder van landbouprodukte. Vir verdere groei is meer markte en veral beleidsekerheid nodig. Hy sê as ’n sektor en ’n land is daar ’n beperkte geleentheid om volhoubare oplossings vir die ingewikkelde probleme van grondhervorming te vind.
“Ons moet dit saam doen en met groot erns bejeën. ’n Holistiese benadering moet gevolg word, want daar is nie een plan wat vir almal gaan werk nie.”
Hy sê vennootskappe moet bevorder en gekoester word om plaaswerkers se lewensgehalte te verbeter en ook ’n nuwe klas swart kommersiële boere te vestig.
“Die deure van die regerende party is nou oop en ons moet met die Regering skakel om planne te begin toepas.”
Hy het verwys na Agri SA se holistiese plan wat in 2014 saamgestel is. Dit bevat elemente, soos volhoubare restitusie-modelle, steun vir boere in kommunale gebiede, volhoubare en bekostigbare finansiering vir nuwe boere en ’n agentskap of spesiale organisasie om na toepassing om te sien.
’n Belangrike element is ’n ontwikkelingsfonds waartoe die landbou, die private sektor én die Regering moet bydra.