AUSTRALIË SE PRODUKSIE DAAL
VOLGENS Australië se jongste vooruitskatting gaan produksie weens die droogte na verwagting tot 322 miljoen kg daal. Dit is selfs laer as in 2015-’16 toe produksie op 325 miljoen kg te staan gekom het.
Australië het tydens die wolbloeityd in die laat 1980’s toe wolpryse op rekordvlakke was, meer as 800 miljoen kg wol per jaar geproduseer.
In 1989-’90 is ’n rekordproduksie van 1 030,9 miljoen kg aangeteken. Suid-Afrika se produksie het in dieselfde seisoen op 96,9 miljoen kg gestaan en die seisoen daarna tot 101,7 miljoen kg gestyg.
Die bodem het kort daarna uit die mark geval weens politieke gebeure in die wêreld se twee grootste wolverbruikerslande.
In China het die bloedblad op Tiananmen-plein in Junie 1998 ná die studente-opstand buitelandse beleggers laat onttrek, wat die land sonder buitelandse inkomste gelaat het om wol te koop.
Die val van kommunisme in November 1989 het die voormalige Sowjetunie (USSR) laat verbrokkel. Saam het dié twee moondhede 36% van die wêreld se wol verbruik, hoofsaaklik vir uniforms.
Die wêreldprys vir wol het daarna drasties gedaal. Australië het met ’n groot voorraad wol gesit en dit het jare geduur voor hy daarvan ontslae kon raak.
Droogtes, die omskakeling na ander boerderyvertakkings en onbestendige wolpryse het daarna veroorsaak dat wolproduksie wêreldwyd begin daal het tot vandag se histories lae vlakke.