‘Wolkaping’ kan Suider-Afrika R500m. kos
SUIDER-AFRIKAANSE wolverkopers gaan byna R600 miljoen se inkomste uit wol verloor nadat die regering van Lesotho nuwe regulasies ingestel het wat die verkoop van wol en bokhaar buite Lesotho se grense verbied.
Voor die regulasies ingestel is, het Lesotho se nasionale wolen bokhaarkwekersvereniging (LNWBKV) die land se eerste minister luidens ’n verklaring versoek om die voorgestelde regulasies te heroorweeg. Die organisasie verteenwoordig ongeveer 37 500 lede en is die grootste organisasie in sy soort in dié land.
“Dit is noodsaaklik om u in kennis te stel dat hierdie inkomste nie net aan ons families bestee word nie, maar ook aan ons veewagters en hul families. Die bedryfskoste om ons kuddes te onderhou, soos vir byvoeding en medisyne, moet ook in berekening gebring word.”
Dié versoek het egter op dowe ore geval en die nuwe regulasies is op 24 September deur die regering aanvaar. Die besluit raak sowat 150 000 huisgesinne.
NIE GERAADPLEEG
Volgens Cape Wools het Lesotho in die 2017-’18-seisoen altesaam 6,1 miljoen kg wol gelewer, wat aan dié land ’n inkomste van sowat R590 miljoen besorg het. Die verbod het nou ’n afname van ongeveer 12,7% wol en 12,2% in inkomste vir Port Elizabeth se wolbeurs tot gevolg.
In ’n onderhoud met die Suid-Afrikaanse Uitsaaikorporasie (SAUK) het mnr. Rantelali Shea, ’n verteenwoordiger van die LNWBKV, gesê boere is glad nie vooraf oor die nuwe regulasies geraadpleeg nie. Die land kan sy internasionale mark verloor.
Hy meen die besluit is polities gedrewe, aangesien die enigste maatskappy in Lesotho wat wol koop, deur drie ministers en ’n sakeman besit word.
AFLEGGINGS KOM
Volgens mnr. Isak Staats, hoofbestuurder van BKB se wol--enbokhaarafdeling, is dit jammer dat die nuwe regulasies ingestel is, maar ’n ander land se wette moet gerespekteer word.
“Ek dink egter die besluit is kortsigtig. Ons ondersteun ons boere en klante daar so goed ons kan. Daar is boere wat tans met regsoptrede besig is, en as hulle ons hulp vra, help ons hulle.
‘Die groot geveg gaan nou oor aan wie bokhaar behoort — die boere of die staat.’
“Die groot geveg gaan nou oor aan wie bokhaar behoort – die boere of die staat.”
Hy sê die regulasies gaan beteken dat die maatskappy van sy werkers sal moet aflê weens die afname in die hoeveelheid wol en bokhaar wat verkoop en gehanteer sal word.
NUWE REGULASIES
Tydens die onderhoud met die SAUK het mnr. Tefo Mapesela, Lesotho se minister van handel, gesê enigeen is welkom om wol en bokhaar te koop, mits dit binne die land se grense is.
Lesotho het egter nie die hoogs gesofistikeerde toerusting en stelsels om die wol en bokhaar te toets nie, aangesien die Woltoetsburo in Port Elizabeth die enigste in sy soort in Afrika is. Volgens ’n lid van ’n afvaardiging uit Lesotho wat onlangs die buro in Port Elizabeth besoek het, sal die oprigting van so ’n sentrum in die nabye toekoms te duur wees, aangesien Lesotho bankrot is.
Daar is tans net een koper in die land. Boere sal dus nie die voordeel van internasionale pryse, wat tans op rekordvlakke is, kry nie.
Volgens The Post is Mapesela besig met ’n landwye veldtog om boere wat die regulasies teenstaan, met geweld uit skeerhokke te probeer verwyder.