Werktuie: Nampo Kaap se bestes
Die Kaap se eie Nampo het vanjaar die eerste keer op Bredasdorp plaasgevind, en meer as 16 200 besoekers het deur die hekke gestroom. Met sowat 300 vertoners met werktuie was dit duidelik dat die Wes-Kaap weer ’n volbloed-landbou-ekspo het. Alle pryse sluit BTW in en kan in sommige gevalle benaderd wees.
Smith Power Verkope van die Strand het sy nuwe Kubota M7172-trekker vertoon. Dit is ideaal vir plantwerk, voer sny, hooimaak en spuitwerk. Dit het ’n Kubota 6,7 Commonrail-enjin en ’n KVT-ratkas wat outomaties en deurlopend die ideale ratverhouding vind vir elke taak. Vanuit die volledig toegeruste kajuit met sy onafhanklike vering word alle funksies beheer. Die trekker het voor en agter ’n driepunt met ’n hysvermoë van onderskeidelik 3 900 kg en 9 500 kg. Dit het vier hidrouliese kragaftakkers. PRYS: Die prys was teen druktyd nog beskikbaar nie. NAVRAE: Mnr. Nicol Schreuder, sel 082 925 0605.
Die McCormick X8.680-swaardienstrekker het ’n sessilinder-Betapower-enjin van 224 kW. Die CVT-ratkas pas outomaties by die werkstoestande aan. Die trekker kan met vier of ses wiele aangedryf word en is toegerus met die jongste satelliettegnologie. Sy hysvermoë agter is 12 ton en voor 5 ton. Wat uniek is, is dat die trekker ’n dubbeldiensstelsel het — een konsentreer net op die hyserstelsels en eksterne koppelings, en die ander op die trekker self. PRYS: R3 881 miljoen. NAVRAE: Mnr. Jean Nel (Argo Industrial, Boksburg), sel 082 802 8079.
Die nuwe Mahindra 7590-plaastrekker het pas in Suid-Afrika aangekom. Dit het ’n Mahindra Vlak 3-dieselenjin wat 48 kW lewer. Dit is verkygbaar in twee- en vierwielaandrywing, en het 12 ratte vorentoe en 12 truratte. Dit is deel van ’n reeks van vyf Mahindra-trekkers wat nou plaaslik beskikbaar is met enjins van 41 kW tot 68 kW. Met die minimum elektronika is dit is die ideale plaastrekker vir gewone plaaswerk. PRYS: R516 235 vir die viertrekmodel. NAVRAE: Mnr. Neil Jensen, sel 083 400 5432.
Case Northmec van Bredasdorp het sy Case Puma 210 Limited Edition ploeg- en algemene plaaswerktrekker vertoon, wat aangedryf word deur ’n 410l Iveco FPT-turbodieselenjin van 157 kW. Dit het ’n 18-gang-Powershift-transmissie met ses truratte. Die hoof- hidrouliese pomp pomp olie teen 120 liter/minuut, en die sekondêre pomp teen 66 liter/minuut. Die trekker het ’n spesiale metaalrooikleur wat hom van die gewone Case Puma 210 onderskei.
PRYS: R2,07 miljoen. NAVRAE: Mnr. Dirkie Engelbrecht, sel 073 538 8918.
Die nuwe Massey Ferguson 2630GE-boordtrekker, wat deur BHBW van Oudtshoorn vertoon is, se viersilinder-Simpson-enjin van 3,6 liter lewer 48 kW. Die trekker het 12 ratte vorentoe en vier truratte. Sy hidrouliese stelsel agter het ’n hysvermoë van 2 050 kg, en die koppelpunte vir werktuie het ’n olievloeitempo van 42 liter/minuut. Dit is ’n grootliks meganiese trekker met min elektronika.
PRYS: R402 500. NAVRAE: Mnr. Riël Deysel, sel 081 809 3863.
HOU DIE VOLGENDE PAAR UITGAWES VAN LANDBOUWEEKBLAD DOP VIR NÓG WERKTUIE EN TOERUSTING OP NAMPO KAAP.