Brei jou veldkennis uit
Skerp jou kennis op oor die veld en natuurlike omgewing met nuttige gidse en boeke.
Stuarts’ Field Guide to National Parks & Reserves of South Africa deur Chris en Mathilde Stuart. Uitgewer: Struik Nature. Prys: R300. Is jy lief vir ’n vakansie in die bos? Suid-Afrika het oorgenoeg parke en reservate om te besoek, en hierdie gids is nuttig om ’n goeie oorsig van meer as 40 bewaringsgebiede in die land te kry – van die Nasionale Krugerwildtuin tot die veel kleiner Oorlogskloof-natuurreservaat in die Noord-Kaap. Dis propvol feite oor die landskappe, plantegroei en dierelewe van elke park, gee ’n lysie hoogtepunte van elkeen en selfs ’n kort geskiedenis oor die ontstaan van die parke. In dié opsig slaag die gids beslis in sy twee doelwitte: Om die natuurlike geskiedenis van Suid-Afrika se bewaringsgebiede te beskryf én om lesers te help om soogdiere, voëls, reptiele, amfibieë en plante in elke park te identifiseer. Wild Karoo deur Mitch Reardon. Uitgewer: Struik Nature. Prys: R270. Mitch Reardon het meer as 4 000 km afgelê om die Karoo behoorlik te ontdek – van die suide, deur die Klein-Karoo tot in die Tankwa en Kamdeboo. Die bewaringswerk van die Karoo Nasionale Park (by Beaufort-Wes) en die Bergkwagga Nasionale Park (Cradock) verdien elkeen hul hoofstukke in die boek. Die Karoo se aantrekkingskrag lê miskien in sy afgesonderdheid en wye landskappe, maar as jy dit van nader bekyk, is dit die plante, geologie, fossiele en dierelewe, asook sy fassinerende geskiedenis wat dié sonderlinge, woestynagtige gebied veral spesiaal maak. Reardon se navorsing lê diep en hy haal graag die ontdekkers van ouds aan. Sy fotografie is ’n uitstekende weerspieëling van die Karoo se legendariese sjarme. Field Guide to Fynbos deur John Manning. Uitgewer: Struik Nature. Prys: R310. Fynbos maak omtrent driekwart van die meer as 9 000 verskillende blomplante waarmee die Kaapse blommeryk spog. Fynbos span dus sonder twyfel die kroon op Suid-Afrika se planteryk en in hierdie gids word meer as 1 000 redelik algemene fynbossoorte beskryf. Die boek beskryf ook presies wat fynbos is, hoe om dit uit te ken, watter klimaat, grond en topografie dit verkies, asook die verhouding tussen brande en fynbos.
Danksy ’n magdom foto’s is dit maklik om die soorte te identifiseer sonder dat jy ’n graad in plantkunde nodig het (in baie gevalle is die “gewone” name ook aangedui. Jy hoef dus nie te stoei met die uitspraak van wetenskaplike benamings nie). Hou die boek in jou bakkie, want dit gaan ’n nuwe wêreld in die veld vir jou oopmaak. Die gids bring jou deeglik onder die indruk van hoe uiteenlopend hierdie plantegroei-tipe is.