Dié week in die landbou

‘SO SKOU JY’

’n Groep beeshanteerders het op die onlangse Windhoekskou ’n kursus bygewoon waar hulle die fynere kunsies van die korrekte manier om ’n dier vir beoordelaars aan te bied, geleer het. Die kursus is deur twee Namibiërs, mnre. Dawid Krause (regs) van Feedmaster en Bertus Dorfling (links), raadgewer oor lewende hawe, aangebied. Hier gebruik hulle ’n koei met haar kalf as voorbeeld. Honderde beeste, skape en bokke van oor die hele land het aan die skou deelgeneem.

GROND-WAARSKUWING

Suid-Afrika kan eindig waar Venezuela nou is as die grondkwessie nie opgelos word nie. As Suid-Afrika nie die Nasionale Ontwikkelingsplan in werking stel nie, gaan die toekoms ’n ontluikende ekonomie soos Suid-Afrika s’n straf. Só het prof. Mohammad Karaan, lid van die Nasionale Beplanningskommissie, gewaarsku op die Landbou-ekonomievereniging van Suid-Afrika se jaarlikse konferensie. Hy sê ’n nuwe vorm van geopolitiek en wêreldhandel kom na vore. “Ten opsigte daarvan sal ander lande en beleggers foute in jou ekonomie soek om jou te straf. Die grondkwessie is ons fout.” Lees meer by bit.ly/2ydcdbH, en hou komende uitgawes van Landbouweekblad dop vir nog nuus oor dié konferensie.

BOOR-MALLIGHEID

Die Stad Kaapstad se plan om watertekorte met ’n boorprogram in die Tafelberg-akwifeer aan te vul, het onder kwaai kritiek van wetenskaplikes deurgeloop wat sê goedkoper en omgewingsvriendeliker opsies moet eers ondersoek word. News24 berig dat dr. Jasper Slingsby van die Suid-Afrikaanse Omgewingswaarnemingsnetwerk (SAEON) sê tot 100 miljoen liter meer water kan daagliks in die Wes-Kaapse damme invloei met alternatiewe maatreëls, soos die verwydering van indringerplante. Dr. Jane Turpie van die Universiteit van Kaapstad se eenheid vir omgewingsbeleid sê sy is ‘‘geskok’’ deur die stad se onwilligheid om die probleem van indringerplante aan te pak.

SOEK JY WERK?

’n Webdiens word binnekort begin waarop landbou-ondernemings en werksoekers mekaar kan vind. Die Universiteit Stellenbosch se fakulteit landbou verskaf die vestigingskapitaal vir die diens. Die doel van die webdiens is om ’n werkportaal te skep waar gegradueerdes, nagraadse studente, gegradueerdes wat reeds internskappe voltooi het, en mense wat reeds in die landbou werk, kan registreer en om poste aansoek doen. Maatskappye kan poste, internskappe en ander werkgeleenthede adverteer. Die portaal sal ook raad verskaf aan gegradueerdes om bykomende, toepaslike vaardighede te ontwikkel om makliker werk te kry. Die webwerf is www.agrijob.co.za

ZEDER SKIET UIT

Die landboubeleggingsmaatskappy Zeder verwag dat sy herhalende wesensverdienste per aandeel vir die jaar tot 31 Augustus 2018 sowat 9,5 tot 10,1 sent, oftewel 150% tot 165% hoër sal wees as in die voorafgaande 12 maande. Die wesensverdienste per aandeel vir die afgelope ses maande van die boekjaar sal 29,9 tot 30,7 sent wees, oftewel 595,3% tot 614% meer as die 4,3 sent vir die ooreenstemmende tydperk in 2017. Luidens ’n verklaring op die JSE-nuusdiens is die stygings danksy ’n herstel in verdienste in die meeste van die maatskappye waarin hy belê het, asook ’n opwaartse aanpassing van die billike waarde van sy belegging in die Chinese varsproduktemaatskappy Joy Wing Mau, wat hy besig is om te verkoop.

WOLVRAAG DAAL

Cape Wools se Merino-aanwyser het ’n verdere 2,3% teruggesak tot R223,96/kg (skoon). Die prys is egter steeds hoër as die hoogste gemiddelde prys wat in die 2017-’18-seisoen behaal is. Die daling word toegeskryf aan ’n middelmatige markvraag na lang en fyn Merinowol ondanks die effens sterker rand. Die Australiese EMI het ook met 1,5% gedaal en Cape Wools se aanwyser vir alle wol het met 2,4% gedaal.

GROOT GELD

Kanonkop se CWG Paul Sauer 2015 het op die 34ste veiling van Nedbank se Kaapse Wynmakersgilde die hoogste prys nóg vir ’n rooiwyn behaal – R22 500 vir ’n kissie met ses bottels. Dit was die eerste Suid-Afrikaanse wyn wat 100 punte by die bekende Britse wynskrywer Tim Atkin gekry het. Die veiling se omset was meer as R10,5 miljoen. Die gemiddelde prys vir ’n kis wyn was R5 265 en vir ’n bottel R878. Singita Tsogo Sun en Marble-restaurant in Johannesburg het saam meer as R2 miljoen se wyn gekoop. Suid-Afrikaanse kopers het 79% van die wyn gekoop. Van die 48 wyne wat aangebied was, was 31 rooiwyne, 14 witwyne, twee Méthode Cap Classique-wyne en een portstyl wyn.