PLASTIEKPYPE MET TREKKER ‘GEPLANT’

Só lyk die apparaat waarmee mnr. Brian Fitzhenry, bekende Karooboer van Mount Stewart in Oos-Kaapland, plastiekpype “plant”. Die ploeg skeur die grond voor oop en die pyp met die kromming lê die plastiekpyp sagkens neer teen ’n tempo van ongeveer agt minute per 500 voet (152,5 meter).

Die koms van plastiekpype het ’n omwenteling in Suid-Afrika se uitgestrekte veestreke tot gevolg gehad. ’n Boer behoort vandag minstens een suiping in elke kamp op sy plaas aan te bring. Fitzhenry het byvoorbeeld reeds ongeveer 40 myl (64,4 km) daarvan gelê.

Die jongste voorbeeld van sy plastiekpypnetwerk is te sien op die plaas Boschfontein in die distrik Steytlerville, waar 7 000 morg (6 000 ha) in meer as 70 kampe verdeel is, elkeen met ’n suiping wat outomaties volgehou moet word. Dit kon Fitzhenry doen danksy net twee standhoudende fonteine, wat elk 150 gelling (682 liter) water per uur lewer — en plastiekpype.