BORRELS WEN BY VERITAS
“VERBRUIKERS is nou meer as ooit bewus van die buitengewone Méthode Cap Classiques wat SuidAfrika kan lewer en hul belangstelling spoor ons aan om verwagtinge elke keer te oorskry.”
Só sê me. Elunda Basson, wynmaker van Pongrácz Blanc de Blancs (geen oesjaar), wat met die louere weggestap het as algehele kampioenwyn op die naweek se Veritastoekennings.
Die wyn het altesame 1 676 ander wyne – ’n rekordgetal inskrywings – uitgestof in die stryd om die Vertextrofee. Dis gemaak van handgeplukte Chardonnaydruiwe en volgens die tradisionele Franse metode toegelaat om 36 maande lank ’n tweede gisting in die bottel te ondergaan.
Distell, die huis van Pongrácz,
het ook die meeste medaljes by Veritas gewen – onder meer 4 dubbelgoue en 17 goue medaljes. Kort op sy hakke was Spier, met 3 dubbelgoue en 11 goues. KWV het die derde plek op die podium gekry, met 3 dubbelgoues en 10 goues. Distell het boonop die brandewynkategorie oorheers en 5 dubbelgoue en 6 goue medaljes huis toe geneem.
Ses internasionale en honderd plaaslike beoordelaars het die wyne oor vyf dae beoordeel. Altesame 1 499 medaljes is toegeken, waarvan 50 dubbelgoud en 219 goud. Die kategorieë wat met inskrywings oorval is, was rooi versnitte, Sauvignon blanc, Shiraz, Cabernet sauvignon, Chenin blanc en Chardonnay.
Sommige van die dubbelgoue en goue medaljewenners sal in spesiale afdelings van uitgesoekte Checkerswinkels beskikbaar wees sodat verbruikers die wenwyne maklik kan uitken.