KONSORTIUM-MERINO SLAAN SLAG VIR WOLBOERE
SUID-AFRIKAANSE wolboere kan nou ’n premie van 5% op hul wol verdien danksy ’n nuwe ooreenkoms tussen die telersgroep Konsortium-Merino, die internasionale vervaardiger van sportklere Decathlon en die wolmakelaar Segard Masurel.
Dié drie maatskappye het ’n memorandum van verstandhouding onderteken dat Konsortium-boere se wol voortaan in Decathlon se sportklere gebruik sal word. Dit sal vooraf teen ’n 5%-premieprys gekontrakteer word, sê mnr. Lawrence Friskin, uitvoerende hoof van Segard Masural in Suid-Afrika.
Decathlon bedryf byna 1 400 winkels in 42 lande. Die maatskappy het 82 000 personeellede en ’n jaarlikse omset van meer as €11 miljard (sowat R187 miljard).
Decathlon se Quechua-reeks spesialiseer in stapklere en -toerusting. ’n Deel van die reeks is verskeie produkte wat stappers
teen die vel dra. Die maatskappy glo wol is die beste vesel vir hierdie soort kledingstuk, sê Friskin.
Decathlon gebruik net Suid-Afrikaanse wol en het nou besluit om ál hierdie wol deur Segard Masurel aan te koop. Voorts het die maatskappy onderneem dat minstens die helfte van die wol van Konsortium-boere moet kom.
ETIESE VESEL
Friskin sê Decathlon stel baie streng vereistes oor die etiese hantering van vee en goeie omgewings- en maatskaplike bestuur op die plaas. ’n Deel van die ooreenkoms is dus dat Segard Masurel plaasoudits gaan doen om te verseker dat aan Decathlon se vereistes voldoen word.
“Hierdie ooreenkoms is ’n nuwe manier van bemarking van Suid-Afrikaanse wol – nie net vir Konsortium se lede nie, maar ook vir ander boere wie se wol en boerderye aan die vereistes voldoen.
“Konsortiumlede se wol sal regstreeks van die plaas af gekoop word teen 5% meer as die markprys op die dag van kontraktering.”
Die doelwit is om wol te kontrakteer nog voor die skape geskeer word, sê hy.
’n Eerste besending wol is reeds aan Decathlon gelewer.