3 AMERIKA | Kan bevrore avokado’s geld maak?
Welch’s, die Amerikaanse kosverwerker wat veral bekend is om sy druiwesap, versnaperings en bevrore vrugte, het onlangs bevrore avokado’s in sakke van 283 g en 907 g begin bemark. Die maatskappy sê op sy webwerf die avokado’s word gevries wanneer hulle ryp is, sodat hulle altyd gereed is wanneer jy hulle nodig het.
Die wêreldwye handel in avokado’s was verlede jaar $13 miljard (R191 miljard) werd, en sal na verwagting tot $23 miljard (R338 miljard) teen 2027 groei, maar almal in die waardeketting krap nog kop oor hoe om die vrugte se kort raklewe te oorkom. Na gelang van hoe smaaklik die bevrore avokado’s is wanneer hulle ontdooi het, kan dit ’n winsgewende nuwe produklyn wees vir Welch’s, een van die weinig oorblywende onafhanklike groot kosmaatskappye in Amerika.