Wenbulle weer vereer

Die nasionale algehele interraswenner van Suid-Afrika se skouwenners word by die Aldam-veeskool aangekondig.

Dié kompetisie was een van die eerstes wat teelwaardes na die skouring gebring het.

Zoetis, Landbouweekblad en Breedplan se kompetisie vir Jong Bul van die Jaar was 13 jaar gelede een van die eerstes wat teelwaardes na die skouring gebring het. Die doelwit van hierdie kompetisie is om skoue te gebruik om genetiese vordering met ekonomiese belangrike eienskappe te bevorder.

Daar is nie altyd ’n hoë korrelasie tussen ’n dier se visuele voorkoms en sy teelwaardes nie. Gevolglik het die Lewendehawe Registrerende Federasie besluit ’n bul wat aan dié klas deelneem, sal om die helfte beoordeel word volgens objektiewe prestasiedata en sy subjektiewe visuele punt.

Alle bulle van 12-36 maande oud met beraamde teelwaardes op skoue, kom in aanmerking. Standaardkriteria word gebruik om die teelwaardes (geboortegewig, speengewig, jaaroudgewig, finale gewig, volwasse koeigewig en skrotumomvang) te meet.

Die onderskeie raswenners ding visueel mee in die interraskompetisie vir die posisie as algehele skouwenner.

2018 SE SKOUWENNERS

Mnre. Carl en Derick le Roux (Xourel-Limousins) se bul Xourel Rainmaker XRL1559 was die algehele skouwenner op die Vryburg-, Lichtenburg- en Bloemfonteinskou. Mnr. Colin Emanuel (Epworth-Angusstoetery) se bul Epworth Wholesome E15-85 is op die Royalskou in Pietermaritzburg as die algehele wenner aangewys. Mnr. Mornay Verster (Le Roc Brangus) se Brangusbul Le-Roc LR15181 het koning gekraai op die nasionale Branguskampioenskapskou. Mnr. Wessel Hattingh (Welcare-stoetery) se bul Welcare Echo WWH1689 het op die nasionale Brahmankampioenskapskou gewen. Mnr. Handri Conradie (Kaalfontein-boerdery) se Simmentalerbul Kaalfontein Zirk KFN176 het op vanjaar se Swartlandskou gewen. Mnr. Piet en me. Berdine Blaauw (Immanuel-stoetery) se Brahmanbul Immanuel Savimbi I15/102 het verlede jaar op die Windhoekskou in Namibië as die algehele skouwenner weggestap.