Die Land Bank se Koeigroep van die Jaar-wenners getuig van die puik teelmateriaal van verskillende beesrasse wat beskikbaar is. Veeskool vereer beste koeigroepe

Vanjaar se wenners in die Land Bank se Koeigroep van die Jaar-kompetisie word op 18 Oktober tydens die Aldam-veeskool vereer. Volgens Breedplan Suider-Afrika het die Lewendehawe Registrerende Federasie besluit om die verskillende kompetisies te vernuwe.

Die Koeigroep van die Jaar is voorheen gekies op grond van die tien beste koeie in elke teler se kudde, gegrond op reproduksie, prestasie en groei of karkasprestasie. Sedert verlede jaar word die wenners uit deelnemende beesrasse op grond van ekonomiese seleksie-indekse gekies, waar van toepassing. Die grootste verandering is dat die hele kudde nou in aanmerking geneem word.

Omdat seleksie-indekse gebruik word, het klein en groot kuddes ’n gelyke kans om te presteer in dié kompetisie.

WENNERS

Mnr. Ferdie Naudé van die plaas Doornpoort by Welkom in die Vrystaat se V5 Branguskoeikudde is 30 jaar oud en lewer jaarliks kampioenkoeie. Me. Charlotte Schuite van die plaas Heelbo naby Rosendal en Paul Roux in die Oos-Vrystaat selekteer al 40 jaar lank. Heelbo-Braford is ’n gerekende stoetery en Schuite is bekend as ’n teler van puik diere. Die Loriza-Brahman-kudde bestaan al sedert 1967. Die egpaar mnr. Louis en me. Christa Meyer boer op die plaas Nietverdiend naby Lichtenburg in Noordwes. Dié koeikudde het dié kompetisie al verskeie kere gewen. Mnr. John en me. Tracey Devonport se Devlan-Limousinstoetery is gevestig aan die Vaaldam se boonste oewer naby Villiers. Die landgoed, Water’s Edge, front 20 km lank aan die dam. Die koeikudde se prestasie en gehalte het die beoordelaars beïndruk. Mnr. Kallie en me. Helene van der Merwe se Santa Gertrudis-koeigroep van die Hepzibah-stoetery is ook ’n finalis. Dié stoetery is naby Ottosdal in Noordwes geleë. Die Exito-stoetery se Simbrakoeigroep behoort aan mnr. Karl-Heinz en me. Sigi Heimstädt van Namibië. Hulle teel sedert 1986 Simbras op hul plaas, Arcadia, sowat 250 km noordoos van Windhoek in die Namibiese sandveld. Die beste Simmentaler-koeigroep in die kompetisie kom uit mnr. Willem Botha se Tendele-Simmentalerstoetery. Dié kudde is tussen Senekal en Marquard in die Oos-Vrystaat geleë.