Uit afdeling: KORTPADKOS VIR KINDERS
Twee bestanddeel-pizzadeeg
Hierdie heerlike pizzadeeg is een van my staatmakerresepte. Jy meng dit binne sekondes en dit hoef glad nie te rys nie. Vir ’n besige ma wat ’n vinnige bederf aanmekaar wil slaan, sonder om gekoopte pizzabasisse te gebruik, is hierdie resep ’n redding. 375 ml bruismeel 3 ml sout 250 ml Griekse jogurt
Voorverhit die oond tot 200 °C. Meng die meel en sout met die jogurt en maak aan tot ’n deeg vorm. Knie die deeg op ’n meelbestrooide oppervlak tot dit glad en elasties voel en nie meer aan jou hande vassit nie. Verdeel in twee en rol die deeg dun of druk dit met jou hande plat. Sit die platgedrukte deeg op ’n gesmeerde bakplaat. Smeer pizzasous of tuisgemaakte tamatiesmoor oor elke basis en voeg dan bolae van jou keuse by. Rond af met gerasperde mozzarellakaas. Bak vir ongeveer 7-10 minute tot die deeg gaar en die kaas op die pizzas gesmelt is. Lewer 2 groot of 4 klein pizzas.