Uit die afdeling: ROOMYS EN VRIESKASKOEK

Sjokoladementroomys

’n Kombinasie van vars kruisement en bros pepermentsjokolade maak hierdie roomys werklik besonders.

8 eiergele

100 ml strooisuiker

500 ml melk

125 ml room

45 ml fyngekapte, vars kruisementblare

2 stafies (49 g elk) Peppermint Crisp-sjokolade, fyn gekap

Klits die eiergele en suiker met ’n elektriese klitser tot dit liggeel en dik is en in ’n dik lint van die klitser afloop. Verhit intussen die melk en room in ’n kastrol tot net onder kookpunt. Laat effens afkoel en giet dan die roommengsel in ’n dun straaltjie by die eiermengsel, terwyl geklop word. Klop die mengsel deeglik en vinnig sodat dit nie skif nie. Giet alles terug in die kastrol en verhit die mengsel oor lae hitte, terwyl aanhoudend geroer word, tot die vla effens verdik is, maar nie kook nie. Laat afkoel. Voeg die kruisement by en meng. Verkoel die vla, giet in ’n roomysmaker en karring tot sag gevries. (As jy nie ’n roomysmaker het nie, giet die eiervla in ’n geskikte bak en vries vir 3-4 uur. Klits goed deur en vries weer tot half gevries.) Vou nou die gekapte sjokolade deur die roomys, bedek en vries tot benodig. Lewer 8 porsies.