DIE GESIGTE AGTER RHINO CONNECT
Me. Tersia Jooste: My passie vir die natuur en mense wat weet hoe om daarmee te werk — ons boere — was al sluimerend in die tyd toe ek as jong veldgids in die Addo-olifantpark nagritte gedoen het. Natuurlik het die gevoel ná bykans twee dekades in die regspraktyk weer sterk kop uitgesteek. My passie is aangevuur deur die belangrike boodskap van ontdekking, toerisme en ontwikkeling wat so ’n groot deel van die Afrikaanse geskiedenis is. Ek het ’n geleentheid gekry en Rhino Connect op die been gebring, en kan met groot dankbaarheid saam my man en kinders die plesiere en probleme van ons erfenis ervaar.
Me. Jana Jooste: Nadat ek die graad B.Soc.Sc. in bedryfsosiologie en arbeidstudies aan die Universiteit van Pretoria voltooi het, het ek tien jaar in die korporatiewe wêreld gewerk voor ek my hoëhakskoene vir stapstewels verruil het. Dit was die beste besluit van my lewe. Ek geniet gehaltetyd met my man en seuntjie van 5 wat graag saam met sy mamma tyd in die veld deurbring. Ek spring verder rond tussen my skootrekenaar, selfoon en vergaderings om al die administratiewe take van Rhino Connect in orde te hou. Ek droom ook daagliks oor nuwe projekte wat ons kan aanpak om dié wonderbaarlike spesie van uitsterwing te red.
Me. Mariska Nel: Net ná skool het ek gou my voete in die Bosveld gevind en my veldgids- en stapgidsopleiding in 2010 voltooi. In 2011 is ek universiteit toe om ’n graad in ekotoerismebestuur te voltooi, en is tans ek met my meestersgraad in natuurbewaring besig. Ek konsentreer op die stresanalise van witrenosters tydens verdowing. Ek sukkel om die stof van my skoene af te skud, maar wanneer ek myself in die stad bevind, werk ek hard saam met die Rhino Connect-span aan ons huidige projekte. Ek doseer ook deeltyds natuurbewaring aan die Tshwaneuniversiteit van Tegnologie. Bewaring is ’n passie en ek is dankbaar dat my werk my passie kan wees!