Veeskool lê klem op wins en vrugbaarheid
Veeboere wat vanjaar se Aldam-veeskool bywoon, kan uitsien na ’n reeks voorleggings en praktiese werksessies oor vrugbaarheid en winsgewendheid, skryf mnr. Kobus Bester, voorsitter van die Lewendehawe Registrerende Federasie.
Tien jaar gelede het die Aldam-veeskool as die Aldam-vleisbeesskool begin. Intussen het dit ontwikkel tot een van die beste jaarlikse geleenthede in sy soort op die kalender.
Die Veeskool streef daarna om die lewendehawebedryf toe te lig aangaande die beste en nuutste tegnologie beskikbaar.
Om al die hoogtepunte oor die jare heen te vermeld, sal te lank duur, maar temas wat ’n ingrypende impak op die bedryf gehad het, was onder meer die bydraes van dr. Roger Hunsley oor vleis- en karkaseienskappe. Dit behels die ekonomiese waarde van voerdoeltreffendheid en dat daar nie net na die gemiddelde daaglikse toename (GDT) en voeromsettingsverhouding (VOV) gekyk moet word nie, maar liefs klem gelê moet word op netto voerdoeltreffendheid.
Belangrike gesprekke oor die rooivleiswaardeketting is ook gevoer. Oor die afgelope paar jaar het die noodsaaklikheid van die gebruik van genomika en moderne wetenskap al hoe duideliker geword. Daarom is die tema van vanjaar se Veeskool “Vrugbaarheid: Die grondslag vir winsgewendheid”.
TOEKOMSBLIK
Die impak van vrugbaarheid op winsgewendheid is alom bekend. Die klem val vanjaar dus ook op wat die volgende stappe is om dié aspek van teling tot voordeel van die boer en die bedryf te optimaliseer.
Elke teler, hetsy stoet of kommersieel, behoort verbind te wees tot deurlopende genetiese vordering.
Allerlei fasette van teling, byvoorbeeld verkorte generasieintervalle, gaan in die toekoms al hoe belangriker word. Deur genomika korrek te gebruik, kan met goeie akkuraatheid en redelike betroubaarheid geneties meerderwaardige diere geïdentifiseer word.
Om deurlopende genetiese vordering te maak, sal behels om hierdie diere (manlik en vroulik) so spoedig en doeltreffend moontlik te laat vermeerder. Dit is uit hierdie denkwyse dat die tema vir vanjaar se Aldam-veeskool ontwikkel is. Die spesialissprekers wat genooi is, is gekies omdat hulle juis daarin ’n bydrae kan lewer.
MÉÉR AS NET KI
Verby is die dae dat genetiese vordering versnel is slegs deur middel van inseminasie met bulle se saad en deur baie nageslag van sekere bulle te verwek. Dit is al geruime tyd moontlik om ook uit vroulike diere baie meer nageslag te verwek.
Die tegnieke en metodes wat daarvoor gebruik word, het oor die jare heen baie ontwikkel en uitgebrei. Dit is dus die ideale geleentheid vir boere om hulle te vergewis van die jongste ontwikkelinge in die bedryf rakende hierdie onderwerp.
Deelnemers aan die Veeskool gaan leer hoe om klem te lê op versnelde genetiese vordering, ook wat dieregetalle betref, deur besluite te neem geskoei op genomiese beginsels met die oog op volhoubare winsgewendheid op lang termyn.