Taai stryd woed tussen toptelers
Die spanning loop hoog om te sien wie vanjaar op die Aldam-veeskool as Pick n Pay se Stoetteler van die Jaar aangewys gaan word. Prof. Frikkie Neser van die Universiteit van die Vrystaat vertel meer.
Drie van verlede jaar se finaliste asook ’n nuwe kandidaat ding mee om vanjaar as Pick n Pay se Stoetteler van die Jaar vereer te word.
Dr. Joggie Briedenhann van die Bonsmarastoetery Hartebeestloop in Namibië het verlede jaar gewen. Die naaswenner was mnr. Christopher Sparks van die Brangusstoetery Mount Olive by Harrismith. Mnr. Ebbi Fischer van die Brahmanstoetery Wokuma in Namibië was derde.
Vanjaar is mnr. André van der Merwe van Wouman Brangus by Reitz ook ’n finalis.
DIE FINALISTE
CHRISTOPHER SPARKS Mount Olive Brangus
Dié leier in die teelbedryf met sy uitgebreide sakebelange se jong kudde bestaan van 2000 af. Die lae tussenkalfperiode van sowat 390 dae vir die afgelope vyf jaar is ’n duidelike bewys daarvan.
Hoewel diere blootgestel word aan uiterste klimaatstoestande (die plaas wat by Montrose in die Vrystaat geleë is, is 1 720 m bo seespiëel), word hulle grootgemaak op slegs ’n goeie lek.
Jong bulle word onderwerp aan veldbultoetse voor hulle gebruik of verkoop word. Hoewel vrugbaarheid die belangrikste seleksiekriterium in die koeikudde is, word groot klem ook op vleisgehalte in die teelbeleid gelê. Danksy ’n gebalanseerde teelbeleid en die wil om te meet het die kudde ’n punt van 4,5 uit 5 gekry vir die volledigheid van prestasie-aantekening.
Sparks neem ook deel aan die ras se genomiese projek. Die verskillende pryse wat die stoetery die afgelope tyd ontvang het, is ’n bewys van die kudde se uitnemendheid. Twintig bulle is verlede jaar aan stoet- en kommersiële telers verkoop.
EBERHARD EN HEIDE FISCHER Wokuma Brahman
Hierdie uitstekende Namibiese stoetery bestaan al langer as 25 jaar. Die akkuraatheid waarmee ’n stoetkudde bestuur word, word weerspieël in die volledige prestasie-aantekening – daarvoor kry dié kudde volpunte (5 uit 5).
Fischer se teelbeleid pas by sy omgewing – hy mik na ’n vrugbare mediumraamkoei met goeie groeivermoë, temperament, bespiering en kapasiteit. Weens die ekstensiewe toestande waaronder die diere aangehou word, moet slegs goed aangepaste diere wat maklik kalf, geselekteer word. Hy en ’n vennoot besit ook die enigste private bultoetsstasie in Namibië wat netto voerinname kan bepaal. Die inligting wat in die toetsstasie ingesamel word, is net so in die genomiese projek gebruik. Dit bewys sy toegewydheid tot die verbetering van nie net sy eie kudde nie, maar ook van Namibië se nasionale kudde.
Ondanks die kwaai droogte wat verlede jaar in Namibië geheers het, is 43 bulle aan stoeten kommersiële telers verkoop – selfs buite Namibië.
ANDRÉ VAN DER MERWE Wouman Brangus
Van der Merwe, wat by Reitz in die Oos-Vrystaat boer, het berge versit in 13 jaar. Nie net kry die kudde volpunte vir volledigheid van prestasie-aantekening nie, maar die Brangusgenootskap het ook dié kudde in 2014, 2015, 2016 en 2017 as die beste Branguskudde in die land aangewys.
Die kudde se gemiddelde tussenkalfperiode is 370 dae met ’n gemiddelde speensyfer van 97,3%. Jong bulle word aan veldbultoetse onderwerp voor hulle gebruik of verkoop word.
Van der Merwe het verlede jaar landwyd 27 bulle aan stoeten kommersiële telers verkoop en is in die Brangusgenootskap se raad verantwoordelik vir genomika.
WESSEL HATTINGH Welcare Brahman
Hattingh is al 30 jaar lank in die stoetbedryf en het al verskeie leiersposisies beklee. Hy en sy seun boer in die Oos-Vrystaat in die distrik Heilbron met rooi en wit Brahmane. Hy gebruik KI en embrio-oorplasing in die kudde. Die kudde se gemiddelde tussenkalfperiode is 433 dae en sy teelbeleid skakel goed in by sy omgewingstoestande. Verlede jaar is 17 bulle aan stoet- en kommersiële telers in Suid-Afrika verkoop. Hattingh neem ook deel aan die Vleisbeesgenomikaprojek.