Vermy dié menings en WhatsApp-groepe
’n Vermaning teen afbrekende kommentaar en die verspreiding van ongegronde menings was deel van mnr. Francois Strydom, uitvoerende hoof van die Senwes-groep, se raad aan sowat 400 boere by Nampopark naby Bothaville.
Geleentheid en risiko is dieselfde ding, maar hulle is aan teenoorgestelde kante van die munt. Só het mnr. Francois Strydom, uitvoerende hoof van Senwes en ook die huidige Agbiz-voorsitter, by Senwes se Toekomsfokusdag by Nampopark gesê. Hy het die verrigtinge begin met ’n treffende bespreking van sommige van die belangrikste kwessies wat die landboubedryf raak.
“Suid-Afrika behoort aan almal van ons, nie net die ouens in die Parlement nie. Ons moet almal ’n verskil maak. Deur ons stories te vertel, gee ons ons perspektiewe.”
Die belangrikheid van persoonlike ontwikkeling in die landbousektor was die tema van Senwes se 15de jaarlikse Toekomsfokusdag, waar boere hul menings kon gee en aan aktuele besprekings kon deelneem.
Strydom het gesê boere moet teen mistroostigheid waak.
“As jy voor die tyd swaarmoedig is, sal jy geleenthede misloop. Waak daarteen om by gewilde menings op WhatsApp-groepe ingetrek te word. Doen moeite om uit te vind wat regtig gebeur, en bespreek kwessies met mense met verskillende sienings en standpunte.”
Dit is belangrik om die werklike probleme agter die kommentaar te verstaan.
“As jy steeds besluite neem op grond van die inligting wat ná ’n paar brandewyne rondom die vleisbraaivuur uitgedeel word, is alles wat jy kry die bydraes van mense wat net so min weet soos jy.”
Strydom het die gehoor herinner dat Suid-Afrikaners sterk is.
“Ons is geneties ontvanklik. As ’n volk van mense het ons baie oorleef en gefloreer. Ons sal hierdeur ook kom,” het hy gesê met verwysing na die huidige gronddebat.
Mnr. Jannie de Villiers van Graan SA en dr. René Uys, ’n bedryfsielkundige, het gepraat oor hoe belangrik dit is om, wat Uys ’n “volledige persoon” noem te word.
“Jy kan nie net op een gebied van jou lewe konsentreer nie,” het Uys gesê.
“Om ’n verskil te maak, moet jy verseker dat jy al die nodige vaardighede het, soos taal, kommunikasie, spiritualiteit, fisieke welstand, en ook die vermoë om te ontspan en tyd vir jouself
‘Waak daarteen om by gewilde menings op WhatsApp-groepe ingetrek te word. Doen moeite om uit te vind wat regtig gebeur, en bespreek kwessies met mense met verskillende sienings en standpunte.” — Mnr. Francois Strydom
te maak.” De Villiers het boere daaraan herinner dat “jy ’n massiewe rol het om te speel in die voorsiening van voedselsekerheid vir alle Suid-Afrikaners”.
Uys het ’n Chinese spreekwoord aangehaal wat relevant is vir die huidige probleme wat die landboubedryf beïnvloed: “As die winde van verandering sterk waai, bou sommige skuilings en ander windmeulens.”
In die paneelbespreking is van eerstehandse ervarings van persoonlike ontwikkeling vertel en bespreek. Me. Emmie Pietersen van die Peritum Agri-instituut, het die gesprek gelei met mnre. Thabo van Zyl, Philip Retief, Brian Angus en Deon Bergh op die paneel.
Van Zyl, ’n suksesvolle boer en lid van die Senwes-direksie, het gesê “solank as wat jy met B-spelers speel, speel jý soos ’n B-speler. Omring jouself met A-spanspelers soos die beste diensverskaffers, werkers en vriende.”
Retief, uitvoerende hoof van Van Loveren-familiewingerd, het gesê daar is nie net een suksesresep nie.
“Daar is meer as een korrekte antwoord. Maak seker jy lei deur hard te werk, nuuskierig te wees en geesdrif te hê. Let op tydsberekening en doeltreffende krisisbestuur.”
Bergh, ’n lid van Graan SA se bestuurspan en medestigter van die jaarlikse Senwes Toekomsfokusdag, het ook sy mening gelug oor persoonlike ontwikkeling.
“Om vooruit te beplan en voorbereid te wees vir kwessies, soos oorerwing en oorhandiging van verantwoordelikhede, is noodsaaklik,” sê hy.
“Ignoreer dié dinge waaroor jy nie beheer het nie, soos politiek. Gaan voort om te plant en hoopvol te wees oor die grondkwessies – voedsel moet geproduseer word,” sê Angus, ’n baanbrekerboer wat die Japanse Wagyu-vleisbeesras in SuidAfrika help vestig het.
Pietersen het ’n aanhaling van Ralph Waldo Emerson voorgehou om boere te inspireer om voort te gaan om te doen wat hulle die beste doen.
“Wat agter ons lê en wat voor ons lê, is klein dingetjies vergeleke met wat binne ons lê.”
Die geleentheid is deur Senwes geborg en aangebied met die samewerking van Agri Noordwes, Vrystaat Landbou en Graan SA ten bate van die Jongboerkomitees van Agri Noordwes en Vrystaat Landbou.