Só skep NWK waardigheid en welvaart
Soveel plattelandse gemeenskappe is onlosmaaklik deel van die landbou. Daarom maak NWK seker dat die gemeenskappe in sy bedieningsgebied ook deel het aan die welvaart van die landbousektor.
Die sukses van NWK se model vir korporatiewe, maatskaplike verantwoordelikheid is gewortel in interafhanklikheid wat binne ’n raamwerk van “doen die regte ding” aangebied word. Dit is onlangs gesien in opknappingswerk op Coligny waar die gemeenskap, organisasies en NWK sáám die dorp opgeruim en verfraai het.
BETER MATRIEKUITSLAE
Die Ikateleng-projek (Empower
yourself) word al sewe jaar lank suksesvol aangebied met die samewerking van die Noordwes-Universiteit se Potchefstroom-kampus. Dit is daarop gemik om matriekuitslae te verbeter sodat meer leerders toelating tot tersiêre instellings kry.
Die projek bied hulp aan leerders deurdat hulle vir 16 Saterdae ekstra klasse ontvang in verskeie vakke, waaronder wiskunde en natuurwetenskappe.
Die matrikulante wat verlede jaar aan die projek deelgeneem het, het uitmuntende matriekuitslae behaal met ’n slaagsyfer van 92,31% vergeleke met die provinsiale slaagsyfer van 82,10%.
Die skoolskoenprojek is vanjaar vir die sewende keer met die samewerking van die departement van onderwys aangepak en 500 leerders van ses skole by Zeerust, Bodibe, Itsoseng en Delareyville is bereik. Elke leerder het ’n paar skoene, kouse en mus- sie ontvang. Sowat 3 700 leerders het al by die projek baat gevind.
Die toppresteerders van die 18 hoërskole in die Ditsobotla-subdistrik wat die verlede jaar die nasionale matriekeksamen afgelê het, is op ’n geleentheid van die departement van onderwys in Noordwes vereer met NWK as hoofborg. Elke topleerder het ’n skootrekenaar, gelaai met die nodige programmatuur, ontvang.
DIE GEMEENSKAP
NWK het kragte saamgesnoer met ander besighede op die dorp vir die Lichtenburg Sympathy Sleepout.
Die doel is om bewustheid te skep oor minderbevoorregtes se probleme. NWK het vanjaar die Thusanang Traumasentrum, Ikageng (’n kleuterskool in Blydeville) asook die Hoërskool Lichtenburg se Hart en Hande-projek ondersteun. Opleiding van en ’n werksessie vir huishulpe word met die samewerking van die Lichtenburg-tuinbouklub aangebied.
Die Hoërskool Lichtenburg het vir die derde jaar ’n manne-aand saam met NWK, Certisure Makelaars en Santam Landbou aangebied. Geld is ingesamel vir die verbetering van die waterinfrastruktuur, aankoop van ’n skoolbus en die opknapping van tydelike klaskamers.
NWK is ook betrokke by die Ottosdal-nagwedloop, Lichies Omgee-projek, Coligny Helpen- de Hand, Mandeladag, Lichtenburg-dieresorg en die lewering van produkte aan verskeie skole om hul infrastruktuur te verbeter.
NWK ondersteun die Movember-inisiatief om die bewusmaking van prostaatkanker te bevorder, asook die Laat die hare waai-aksie vir die bewusmaking van kanker.
Die geld word aan die Lichtenburg-kankerkliniek geskenk.
Die NWK Leweransiersgholfdag, beter bekend as die Grip for Charity-gholfdag, is vanjaar vir die 13de keer aangebied. Die afgelope 12 jaar is R1 261 000 vir 19 instellings ingesamel.
LANDELIKE VEILIGHEID
NWK, in vennootskap met die radiodiens OFM, Afgri en Senwes, samel geld in vir die Agri Securitas-trustfonds tydens die jaarlikse kongres van Agri SA. Dit staan Agri Securitas by met sy pogings om beter veiligheid in landelike gebiede in Suid-Afrika te verskaf. Dié vier instellings het verlede jaar R456 000 ingesamel. NWK, OFM en Senwes bied weer op 25 Oktober ’n gholfdag ten bate van die Agri Securitas-trustfonds aan.
’n Bykomende R25 000 vir landelike veiligheid is verlede jaar geskenk.
DROOGTEHULP
Graan SA se droogtehulpprojek om boere in die Noord- en WesKaap te help, is ondersteun deur Opti Chicks wat 112 bale voer aan Agri Noord-Kaap geskenk het. NWK het ’n veldtog onder sy eie boere gevoer om graan vir die projek beskikbaar te stel. Byna 100 ton mielies is deur boere geskenk en NWK het van die vervoerkoste gesubsidieer.
BORG KONGRESSE
NWK ondersteun die georganiseerde landbou en is by verskeie kongresse as borg betrokke. Dit sluit onder meer in Graan SA se jaarkongres, Agri SA se jaarkongres, Agri NW se Jongboerkonferensie, TLU SA se jaarkongres, TLU SA se Jongboerkonferensie, die jaarkongres van Noordwes se VLU en ook hul drie streekkonferensies, en die jaarkongres van Noordwes se Rooivleisprodusente-organisasie.
NASIE IN GESPREK
Hierdie inisiatief is in 2013 gebore om ’n platform te skep vir gesonde debatvoering oor sleutelvraagstukke wat die landbou en die samelewing raak en die gehoor buite die landbou te bereik om die publiek oor landbouvraagstukke in te lig.
NWK was vanjaar weer een van die goue vennote en deelnemers aan die Nasie in Gesprek-televisiereeks.