KATOENHEMDE SONDER KREUKELS?
Dit kan ’n werklikheid word dat ’n katoenhemp nie gestryk hoef te word nie of met al die kreukels te sukkel nadat dit gewas of gedra is nie, danksy die werk van ’n span wetenskaplikes van Australië se wetenskaplike en nywerheidsnavorsingsorganisasie (CSIRO) wat besig is met ’n projek om nuwegeslag-katoen te ontwikkel.
Die CSIRO-navorsingspan streef daarna om ’n plant te kweek met die eienskappe van sintetiese materiaal, om dus ’n rekbare, waterdigte vesel te lewer wat nie kreukel nie, maar steeds natuurlik voel.
Dr. Colleen MacMillan, ’n senior navorsingswetenskaplike, het gesê die span ondersoek die struktuur van katoenselwande en probeer om molekules in die selwande te plaas wat die plant nuwe eienskappe sal gee. “Ons gebruik spesiale molekulêre gereedskap, bekend as sintetiese biologiegereedskap, wat deur die natuur geïnspireer word en daarin voorkom, om die nuwegeslag-katoen te produseer.”
Die oogmerk is ’n plant wat nuwe natuurlike vesels met van die eienskappe van sintetiese materiaal kan produseer.
Pleks daarvan om chemikalieë te gebruik om sintetiese vesels te produseer wat van niehernubare bronne kom en ontbind tot mikroplastiekstukkies wat die see besoedel, gebruik die navorsingspan die katoenplant om die natuurlike vesels hernubaarr te produseer.
Die vesels kan dan in die omgewing ontbind. “Dit is ’n splinternuwe natuurlike vesel wat ons hoop goed vir die planeet sal wees.
“Besoedeling deur sintetiese mikrovesels raak ’n yslike probleem. Die mikroplastiekstukkies wat in die oseane beland, beland ook in diere, in visse, in mense, in ons grond en selfs in tafelsout – en dit is sleg.”
’n Ekoloog, Mike Brown van die Universiteit van Nieu-Suid-Wallis, het in 2011 navorsing gepubliseer waarin hy daarop aanspraak gemaak het dat mikrovesels meer as 85% van plastiekbesoedeling aan die wêreld se kuslyne uitmaak.
Australië se katoenbedryf is na raming $2,5 miljard werd en is bekend om sy produksie van hoëgehaltekatoen en dat die bedryf die waterdoeltreffendste ter wêreld is.
MacMillan het gesê die verbruikersvraag na volhoubare materiale – veral tekstiele – het begin styg en boonop dring internasionale en nasionale kleinhandelaars aan op meer volhoubare materiale in die tekstielbedryf.
Sy het gesê as die nuwe navorsing suksesvol is, sal verbruikers meer volhoubare tekstielstowwe wat van ’n hoë gehalte is, langer hou en beter vir die omgewing is, kan dra.
Mnr. Hamish McIntyre, voorsitter van Katoen Australië, het gesê mensgemaakte vesels is katoenboere se grootste mededinger. Die skep van nuwe katoeneienskappe wat meebring dat verbruikers nie hoef te stryk nie en die produk meer drabaar maak, sal die bedryf help en ook tot voordeel van die verbruiker wees. “Enigiets wat ons kan doen om ons vesel te verbeter om dit meer verkoopbaar aan die breër gemeenskap te maak, is ’n goeie ding vir ons.”
BRON: https://goo.gl/oTxUQQ