Nóg werktuie vir Northmec
Maschio Gaspardo en Northmec is nou gedugter as ooit tevore. Met Northmec se onlangse oorname van dié bekende handelsmerk sal Maschio Gaspardo ’n groter reikwydte hê in die Suid-Afrikaanse mark vir landboumeganisasie.
Maschio Gaspardo is al byna 30 jaar in Suid-Afrika teenwoordig. Die maatskappy is sedert die laat 1980’s bekend om sy uitstekende groente-, mielie- en kleingraanplanters. Sedert die maatskappy se ontstaan in 1964 het hy talle verskaffers bekom wat daartoe bygedra het dat Maschio Gaspardo die wêreld se derde grootste verskaffer is van ’n volledige reeks landbouwerktuie.
Die twee Maschio-broers het klein begin en aanvanklik draaiskoffels (rotary tillers) ontwerp en vervaardig. Binne ’n paar jaar het hulle ’n volwaardige nywerheidsproduksielyn gehad.
In 1994 het hulle Gaspardo bekom, wat sedert 1834 bekend is om die vervaardiging van kleinsaaden fynsaadplanters, en die gekombineerde handelsmerk Maschio Gaspardo gevestig.
VOORDELE
Wat beteken Northmec se oorname van die Maschio Gaspardo-reeks vir die Suid-Afrikaanse produsent? Northmec se reeks werktuie is nou meer divers as ooit tevore. Dit sluit Maschio Gaspardo-toerusting in, waaronder ’n volledige reeks draaiskoffels, krag-êe, gras- en stokkiemaaiers (mulchers), presisieplanters, kleingraanplanters, tandwerktuie, kombinasiegrondbewerkingtoerusting en ’n volledige reeks dubbelskyf-kunsmisstrooiers. Northmec kan in goeie en slegte tye in voorraad belê. Dit beteken volledige werktuie en onderdele is altyd beskikbaar wanneer die boer dit die meeste nodig het. Tegniese ondersteuning is regstreeks van Maschio Gaspardo af in Suid-Afrika beskikbaar. Gevolglik is daar doeltreffende kommunikasie tussen die verskaffer en verspreider tot voordeel van die produsent.
PRODUKTE
Maschio Gaspardo het puik produkte. Hier is ’n paar unieke eienskappe van sommige van die bekendste werktuie. Dubbelskyf-kunsmisstrooiers. Maschio Gaspardo het een van die grootste reekse driepuntstrooiers – die Ciro 600 (600 liter), die Zeno- reeks (900-3 200 liter) en die reeks Primo-presiesiestrooiers (1 800-3 200 liter). Hierdie reeks bied die keuse van klein tot groot, met opsies van verskillende strooiwydtes van 12 m tot 48 m. ’n Unieke eienskap is die roterende skudmeganisme wat verseker dat die kunsmis egalig en vinnig kan vloei sonder om die korrels fyn te maal. Dracula-kombinasiewerktuig. Hierdie werktuig is bekend om duursaamheid en uitstekende werkverrigting. Danksy die kombinasie van twee rye skottels, tande, die gelykmaakstelsel en ’n agterste roller kan jy in plantreste werk, grond deurlug en gelyk maak, en die saadbed voorberei – alles met een bewerking. Dié werktuig het ’n werkdiepte van 5-30 cm en is in opsies van 4 m en 6 m wyd beskikbaar. Die Draculakombinasiewerktuig is die ideale keuse vir boere om optimale toestande vir beter opbrengste en winsgewendheid te verseker.