LANDBOUTOERISME SE VYF TREKPLEISTERS
Daar is vyf redes waarom toeriste die vier plaasroetes (farm loops )buite Portland in Oregon besoek, sê me. Mary Stewart van die Oregon-staatsuniversiteit. Hoe meer plase daaraan voldoen, hoe gewilder sal die roetes wees.
Regstreekse verkope. Die klem moet op gehalte wees. Vars produkte is onmisbaar in die aanbod omdat dit ’n daaglikse benodigheid in elke huis is.
Opvoeding en die geleentheid vir oud en jonk om buite te wees. “Die opvoeding van volwassenes is net so belangrik as om vir kinders te wys waar voedsel vandaan kom. Mense wil graag weet wat regtig die stand van sake rakende die gebruik van chemikalieë is en hoe die seisoene produksie beïnvloed,” sê Stewart.
Gasvryheid. In die Farmlandia-plaasroete is gasvryheid meestal op restaurante van toepassing, maar plaasverblyf is ook besig om te groei namate mense van elders al hoe meer die vallei kom besoek om die roetes te ervaar.
Hierdie toeriste kom ook dikwels om die sport- en ontspanningsgeriewe van die verskillende roetes te geniet, wat die vierde trekpleister is. “Bergfiets- en staproetes, voëlkykgeleenthede en watersport is alles gewilde vermaak in die omgewing. Die boerderye gebruik dit om besoekers na die plase en plaaswinkels te lok.”
Die laaste manier waarop boere plaaslike toeriste kan lok, is met vermaak, soos mieliedoolhowe wat einde Oktober op etlike plase vir Halloween gesny word uit mielielande wat spesiaal vir dié doel aangeplant word. Stewart sê die doolhowe is baie gewild onder oud en jonk en bied eindelose vermaak.