Dié week in die landbou
AFRIBEEF MIK NOORD
Afribeef, handelsmerk van Afrikanerbeesvleis, gaan nou ook in Namibië geproduseer word nadat dit reeds meer as ’n jaar gelede in Suid-Afrika bekend gestel is. Die ras het danksy sy genetiese samestelling sagte vleis en is volgens mnr. De Wet Mouton, voorsitter van die Afrikaner-beestelersgenootskap van Namibië, is die ras ook gehard en aanpasbaar. Weens die aanvanklik verwagte klein aanbod sal die klem eers op die gasvryheidsbedryf wees. By die bekendstelling van Afribeef in Windhoek het me. Sanet Prinsloo, bekende Namibiese meestersjef (regs), ’n aantal smuldisse van die vleis voorberei. Lees meer by bit.ly/2C8HhNp.
ENT JOU HERKOUERS!
Suid-Afrika voer 80% van sy wolskeersel na China uit en dié land het reeds gesê hy koop nie van gebiede wat deur slenkdalkoors geraak word nie. In die lig daarvan het mnr. Jan Louis Venter, produksieraadgewer van die Nasionale Wolkwekersvereniging (NWKV) in die Vrystaat, op ’n boeredag van die Universiteit van die Vrystaat in Bloemfontein by veeboere gepleit om alle herkouers te laat inent, want “hulle word almal deur die siekte geraak”. Slenkdalkoors het in Mei vanjaar by Jacobsdal in die
Vrystaat uitgebreek en kenners waarsku dat een uitbreking die waarskynlikheid van nog uitbrekings drasties verhoog.
SÓ SKEP JY WERK
Die ekonomie moet groei en korrupsie moet uitgeroei word voor beduidende werkskepping in die land moontlik is. Dít was die standpunt van Besigheidseenheid Suid-Afrika (Busa) en dié van Agri SA na afloop van die onlangse twee dag lange nasionale werkberaad in Midrand. Me. Jahni de Villiers, Agri SA se hoof van arbeid en ontwikkeling, sê van die ingrypings om werkskepping aan te moedig, sluit in die bevordering van die landbou, landbouverwerking en die landbouwaardeketting, asook finansiering vir transformasie in die landbou. Pogings word ook aangewend om Suid-Afrikaanse uitvoer te versterk en uit te brei.
PIONEER STAAN STERK
Die genoteerde kosprodusent en -verwerker Pioneer verwag dat sy bedryfswins vir die jaar tot 30 September voor kapitaaluitgawes 34% tot 44% hoër sal wees as in die ooreenstemmende tyd die vorige jaar. Dit sal R1,549 miljard tot R1,665 miljard beloop, teenoor die vorige jaar se R1,156 miljard. Die wesensverdienste per aandeel sal 32% tot 34% hoër wees, teen 541,3 sent en 582,3 sent. Die maatskappy sê in ’n aankondiging op die JSE-nuusdiens handelsomstandighede is steeds onder druk weens opwaartse inflasiedruk in die verbruikersmark.
SUIKER-INSINKING
Die suikerprodusent Tongaat Hulett se bedryfswins vir die ses maande tot 30 September gaan waarskynlik minstens 40% minder wees as die R1,471 miljard in die ooreenstemmende tyd verlede jaar. Die maatskappy skryf die swak resultate toe aan ’n onvermoë om enige grondtransaksies af te handel, druk op binnelandse winste weens die nultarief op suikerinvoer wat verlede jaar in Suid-Afrika geheers het, en die impak van laer wêreldsuikerpryse en ’n sterker metical (die Mosambiekse geldeenheid) op winste van sy Mosambiekse be- drywighede. Wesensverdienste sal minstens 60% laer wees.
GEEN AMNESTIE
Die moontlikheid van ’n vuurwapen-amnestietydperk is van die baan nadat mnr. Bheki Cele, Minister van Polisie, op advies van sy regspan ’n aansoek vir amnestie teruggetrek het. Dit volg op ’n tussentydse interdik wat deur die vuurwapeneienaarsvereniging Gun Owners South Africa (Gosa) bekom is om die polisie se invordering van vuurwapens met vervalde lisensies stop te sit. Die polisie se invordering volg op ’n beslissing deur die Grondwethof dat sulke vuurwapens in onwettige besit is. Dit is nie duidelik wanneer die Gosa-hofsaak aangehoor word nie.
WEN-BORRELS
Die boetiekkelder Domaine des Dieux van die Hemel en Aardevallei is aangewys as die beste Cap Classique-wyn by die Amorim Cap Classique-uitdaging in Kaapstad. Sy Claudia Brut MCC 2012 is as die beste wyn in die Brut-kategorie aangewys en die kelder het die hoogste puntetelling van al die ingeskrewe wyne ontvang. Daar was vanjaar ’n rekordgetal 127 inskrywings. Die klaswenners was Simonsig Woolworths Pinot Noir Rosé 2016 (Rosé-kategorie), Colmant Brut Chardonnay NV (Blanc de blancs-kategorie) en Pongracz Desi 2009 (museumklas).