Sensus: Om getel te word, is verpligtend
DEELNAME aan die sensus van die kommersiële landbou is verpligtend, en Statistieke Suid-Afrika (Stats SA) voorsien nie dat boere onwillig gaan wees om deel te neem nie.
Mnr. Risenga Maluleke, statistikus-generaal van Stats SA, het in ’n inligtingsessie vir die media in Pretoria en Kaapstad gesê hy dink ook nie daar gaan ander probleme wees wat met die politieke klimaat in die land verband hou nie.
Hy het verder gesê Stats Suid-Afrika is onafhanklik en verbind tot “ernstige voorwaardes” om vertroulikheid te waarborg. “Die inligting van individue en besighede sal vertroulik gehanteer word.”
Die doel van die sensus is om inligting oor die grootte, struktuur en aard van die kommersiële landbou op munisipale vlak te versamel.
BEDAG OP BESIGE TYE
Sensusopnames begin op 15 Oktober in alle provinsies en duur tot 15 Desember wanneer opnames tot middel-Januarie onderbreek word. Veldwerkers sal nie noodwendig op enige gegewe dag in elke munisipale gebied in die land werk nie. Maluleke sê hulle sal bedag wees op besige tye, soos oestyd en planttyd.
Volgens Stats SA se beplanning sal die opnames teen April 2019 afgesluit word. Hulle sal dadelik met opvolgopnames begin. Die uitslae van die sensus sal in November 2019 bekend gemaak word.
Die Suid-Afrikaanse Inkomstediens se besigheidsregister vorm die grondslag van die sensus. Opnames sal dus net gedoen word by boerderye wat vir BTW geregistreer is. Maluleke het gesê die Departement van Landbou, Bosbou en Visserye sal ’n register opstel van kleinboere wat nie vir BTW geregistreer is nie. Dit sal minstens twee jaar duur om te voltooi.
PLAASVEILIGHEID
Hy het gesê die sensus is belangrik om te help met beplanning sodat voedselsekerheid op die lang duur voorsien kan word, om inligting te kry om die regte belegging in landbounavorsing te maak, te sien hoe indiensneming in die landbou lyk en wat die rol van vroue in die sektor is. Die sensus sal ook ’n grondslag verskaf vir die monitering en evaluering van stappe om die landbou te verbeter, en help om die bydrae te bepaal wat die landbou tot die ekonomie lewer.
Stats SA werk saam met die georganiseerde landbou, sekerheidsmaatskappye en die polisie om inligting oor die sensus te versprei.
Na aanleiding van ’n vraag oor plaasveiligheid het Maluleke gesê veldwerkers sal die plaasprotokol respekteer.
Mnr. Joe de Beer, adjunk-direkteur-generaal van ekonomiese statistiek, het gesê die Stats SA-kenteken sal op veldwerkers se blou oorbaadjies, identiteitskaarte en hul voertuie vertoon word.
Veldwerkers sal tablette gebruik om die onderhoude te voer en die data vas te lê. Die sensusvraelys dek alle aspekte van gewasen veeproduksie, wildboerdery, bosbou en visboerdery in vars en seewater. Die vraelys sluit vrae oor finansiële inligting, plaasgrootte, grondgebruik, grondbesit, boerderyverliese, meganisasie en indiensneming in.
Veldwerkers sal nie sonder ’n afspraak op die plase opdaag nie. Boere wat met Stats SA oor die sensus wil kontak maak, kan
0080 212 169 tolvry skakel, of e-pos na agriculture@statssa.
gov.za stuur. Maluleke het gesê Stats SA het ’n “ondersteuningstruktuur” wat regstaan om te help.