Groot hoop vir nuwe katoenboere
DIE Landbounavorsingsraad (LNR) is optimisties dat ’n nuwe projek in die katoenbedryf kan help om katoenboere se produktiwiteit en winsgewendheid te verhoog.
Volgens prof. Mohammed Jeenah, groephoof van navorsing en innoveringstelsels van die LNR, vind meer as 800 opkomende boere baat by die program, wat met die samewerking van die Departement van Landelike Ontwikkeling en Grondhervorming op die been gebring is. Deelnemers word bygestaan deur onder meer die LNR se kleinboerontwikkelingsprojek vir katoenproduksie, wat tegniese steun verskaf.
“Tot op hede is 752 boere in die Nkomazistreek in Mpumalanga gehelp om 1 590 ton katoen te lewer, terwyl 51 boere in die Nokanenggebied in Mpumalanga met behulp van die projek 195 ton katoen gelewer het,” sêhy.
In Limpopo het 17 katoenboere 304 ton katoen gelewer.
Nuwe boere op die Makathinivlakte in KwaZuluNatal is ook opgelei en van tegniese ondersteuning voorsien om uiteinde lik altesame 888 ton katoen te lewer.
PRYSE BRING GROEI
Intussen blyk dit of die plaaslike katoenmark baat vind by die tam pryse vir mededingende somergewasse, soos mielies en sonneblomme.
Volgens Katoen SuidAfrika is die negende produksieskatting vir die 2017’18produksiejaar ’n oes van 195 805 lintbale – 152% hoër as die opbrengs in die ooreenstemmende tyd verlede jaar. Daar is 68% meer hektare katoen op droëland aangeplant en 171% meer op besproeiingsgrond.
Mnr. Koot Louw, sekretaris van Katoen SA, sê benewens die invloed van die prys, is daar ook nuwe belangstelling in katoenproduksie omdat die pluktegnologie vir veral droëlandpraktyke oor die afgelope jare goedkoper en doeltreffender geword het. Katoen SA het ook moeite gedoen om die gewas onder boere se aandag te bring as ’n alternatiewe gewas om te oorweeg danksy sy goeie droogteverdraagsaamheid.
Louw verwag ’n toename in die aantal hektare wat in die 2018’19groeityd onder katoen verbou gaan word en dat die wisselkoers boere wat katoen lewer, bevoordeel.
Louw sê SuidAfrika voer nagenoeg 80% van sy katoen uit omdat dit van so ’n hoë gehalte is. Plaaslike katoenwewers gebruik grootliks ingevoerde katoen.