Motsepe bring boodskap van hoop vir boere
SUID-AFRIKAANSE boere is nie op hul eie nie, al voel dit dalk so vir hulle, het mnr. Patrice Motsepe, uitvoerende voorsitter van African Rainbow Minerals, gesê.
Hy het gesê swart én wit boere word deur moord en misdaad geraak, en baie van die beloftes wat politici en die Regering daaroor maak, “maak geen sin nie”.
“Vir ons as Suid-Afrikaners het die waarheid en dit wat ons ervaar, ’n wesenlike invloed op ons siening en of ons vol moed is oor die toekoms.”
Motsepe, ’n mynmagnaat wat onder die wêreld se rykste mense tel, het gesê hy is nie ten gunste van leë motiveringsboodskappe nie en die feite spreek vanself. Tog is hy optimisties oor die toekoms van die landbou- en voedselverwerkingsbedryf.
Sy oupa en pa was boere, en hyself ook. “Ek het geen twyfel nie dat ons oor drie, vyf of sewe jaar gaan terugkyk en sê: Daar was groot probleme in 2018, maar ons het dit oorkom.”
INKLUSIEF
Motsepe het gesê dit is belangrik dat gemarginaliseerde Suid-Afrikaners deel van die ekonomie word, anders het die land geen toekoms nie. Die toekoms van die elite van die land, waarvan hy deel is, is volgens hom onlosmaaklik verbind aan die skep van ’n toekoms vir en die insluiting van die gemarginaliseerdes en werkloses.
“Ons is geneig om daarna as ’n wit-swart-kwessie te kyk, maar dit is nie.”
Hy het gesê alle Suid-Afrikaners moet saamstem dat die land se toekomstige sukses daarvan afhang dat almal ingesluit word.
Hy het gesê hy is daartoe verbind om te help verseker daar is ’n betekenisvolle aantal swart boere en gemeenskappe wat voordeel uit die landbou- en voedselverwerkingsbedryf trek.
AANSPORINGS NODIG
Dit is volgens hom belangrik om vir die wêreld te wys daar is wel suksesverhale van vennootskappe tussen wit en swart boere. Die Regering moet aansporings oorweeg sodat vennootskappe vir albei partye voordele bied.
Die suksesvolste lande is, volgens hom, dié wat ’n omgewing geskep het waarin die private sektor kan ontwikkel en groei en sukses kan behaal, en die vertroue het om te belê.