Jong boere se rol in landbou

Die sukses van die Suid-Afrikaanse landbou rus op die skouers van jong boere. Die regte vaardighede en ingesteldheid moet aan hulle oorgedra word sodat hulle goeie, slim besluite kan neem.

Die landbou is die sektor in SuidAfrika wat ondanks die land se probleme uitstekende groei in bruto produksiewaarde toon. Die landbou vaar baie goed gemeet teenoor die land se ekonomiese groei. Boere wat risiko’s loop, insette aankoop en produksie vir plaaslike verbruik en uitvoer lewer, het ’n groot aandeel hierin.

Suid-Afrika se boere word egter minder en hul gemiddelde ouderdom is buitengewoon hoog.

Prof. Thomas Stanley, ’n Amerikaanse ekonoom en professor, het bevind miljoenêrs se inkomste bereik ’n hoogtepunt wanneer hulle 44 tot 54 jaar oud is. Die netto waarde van hul bates bereik ’n hoogtepunt wanneer hulle 55 tot 64 jaar oud is.

Die besluit om ’n boerdery te bedryf om eendag ’n miljoenêr te word, is nie ’n kitsresep tot sukses en rykdom nie. Jy is egter op die regte pad. Die toetrede van jong boere en die oordrag van vaardighede behoort vir ouer boere ’n voorrangsaak te wees.

JOU OMGEWING

Daar is nie ’n betekenisvolle verband tussen die netto waarde en inkomste van suksesvolle boere en hul akademiese prestasies nie. Dit is belangriker dat jy tydens jou opleiding selfdissipline aanleer, leer om te fokus en hoe om jou tyd doeltreffend te gebruik. Dit sal jou boerdery eendag ekonomies produktief en mededingend maak.

Gebruik die geleentheid om mensekennis op te doen en goeie verhoudinge te handhaaf. Jy kan nie sukses behaal sonder goeie verhoudinge nie.

Suksesvolle boere vind oplossings om hul tekortkominge die hoof te bied en kies hul vertakkings met omsigtigheid. Suksesvolle boere werk hard, geniet wat hulle doen, hou moed en bied ander produkte aan die mark as wat die meerderheid reeds doen. Die regte eggenoot of lewensmaat is ook belangrik.

’n Land se ekonomie moet toekomstige boere wat sukses kan behaal, beloon en nie straf nie. Goeie ekonomiese groei volg goeie landsbeleid. Die georganiseerde landbou streef daarna om ’n omgewing te skep waarin boere ekonomies produktief en suksesvol kan wees.

Dink wyer as Suid-Afrika en let op geleenthede in die res van die streek. Suid-Afrika se ekonomie kan nie groei sonder die ontwikkeling van Afrika suid van die Sahara nie.

RAAD AAN JONG BOERE

Amerikaanse miljoenêrs in Stanley se studie het enkele aspekte aangedui wat belangrik is vir ekonomiese sukses. Dit behoort vir voornemende jong boere ook waar te wees. Indien die ekonomie in Suid-Afrika en Afrika suid van dieSaharaniejouhardewerk en integriteit beloon nie, moet jy leiding neem en betrokke raak by die georganiseerde landboustrukture. Vergeet van akademiese rekords wat swakker is as waarop jy gehoop het. Jy kan steeds jou ekonomies produktiewe potensiaal bereik. Hou moed. Loop ’n mate van finansiële risiko en oorkom jou mislukkings. Streef na finansiële onafhanklikheid. Kies ’n boerderyvertakking wat nie net uniek en winsgewend is nie, maar ook een waarvoor jy lief is. Kies jou huweliksmaat versigtig! Die produktiefste mense kies huweliksmaats wat nie noodwendig beeldskoon is nie, maar eienskappe het wat met sukses versoenbaar is. Suksesvolle miljoenêrs bedryf ’n ekonomies produktiewe huishouding, hou hul lewenskoste onder beheer, koop nie onnodig nuwe artikels nie en doen self herstelwerk. Wanneer vaste bates op langer termyn gekoop word, word daar oor die prys onderhandel. Miljoenêrs het ’n gebalanseerde lewenstyl en kuier eerder saam met familie en vriende as om gereeld op duur en eksotiese vakansies te gaan of duur stokperdjies te beoefen. Op lang termyn is dit die moeite werd om die saamgestelde opbrengs op die geld wat gespaar word, eerder in jou eie boerdery of elders te belê.

GEVOLGTREKKING

Oorkom jou vrese en begin boer. Werk hard en beplan deeglik. Moenie besluiteloos wees nie. Moet jou nie blind staar teen die mislukkings van die verlede nie. Kry raad van goeie boere. Oefen gereeld en gebruik die geestelike taaiheid wat deur sport ontwikkel word. Moenie gebed, geloof en die vermoë om jou seëninge te tel, onderskat nie. Miljoenêrs doen dit!