LANDBOUSENSUS BEGIN
DIE sensus van die kommersiële landbou het op 15 Oktober by ’n eierboerdery buite Bapsfontein in Gauteng begin.
Mnr. Risenga Maluleke, statistikus-generaal, het die Janelda-boerdery van mnr. Jan Basson en sy vrou, Anelda, saam met veldwerkers en joernaliste besoek om die begin van die sensus bekend te stel.
Van die inligting wat in die opname gevra word, is watter struktuur van eienaarskap gebruik
word, hoe groot ’n plaas is en wat verbou word.
“Ons stel nie belang in die name van die eienaars nie, maar in die struktuur,” het Maluleke gesê.
Hoewel wetgewing bepaal dat ’n boer ’n boete of tronkstraf opgelê kan word as hy of sy weier om vrae te antwoord, het hy gesê Statistieke SA stel nie daarin belang om boere te laat vervolg nie.
“Ons taak is meting.” Basson het gesê daar is niks “sinisters” in die vrae in die opname nie.
Kapt. Lucas Makuwa, waarnemende stasiebevelvoerder van die Welbekend-polisiekantoor, het die amptenare van Statistieke SA na die plaas vergesel en het benadruk hoe belangrik dit vir boere se gemoedsrus oor vei-
ligheid is dat polisiekantore weet wanneer daar veldwerkers in ’n gebied is.
Veldwerkers dra blou beffies en pette wat aandui dat hulle van Statistieke SA is. Alle veldwerkers dra ook identifikasiekaarte.
Boere wat twyfel oor iemand se identiteit, kan die inbelsentrum by tel. 0800 212 169 skakel.