BEDRYF VEREER TALLE VIR VOLHARDING IN DIE LANDBOU
DIE Suid-Afrikaanse sagtevrugtebedryf het op sy 43ste jaarlikse gala-aand op Somerset-Wes eerbewyse vir uitsonderlike prestasie in die landbou oorhandig.
Sagtevrugte sluit appels, pere, appelkose, perskes, nektariens, pruime en pruimedante, kersies, tafeldruiwe en gedroogde druiwe in. Hierdie vrugte word hoofsaaklik in die Wes-Kaap verbou.
Mnr. Sivuyile Panya van Kromfontein in die Koue-Bokkeveld is as die Algemene Landbouwerker van die Jaar aangewys vir sy uitsonderlike werksetiek en boordvernuf.
Mnr. Willem Booise, produksiebestuurder van Bergendal naby Citrusdal, is as die Spesialislandbouwerker van die Jaar aangewys. Hy werk al 23 jaar lank op Bergendal en het as ’n algemene werker begin. Hy bestuur meer as 300 werkers en sien toe dat gehaltewerk gelewer word en dat spanleiers opdragte reg uitvoer
Mnr. Elvis Pieters van Rietfontein, Koue-Bokkeveld, is as die Gevorderde Landbouwerker van die Jaar aangewys. Pieters het in 2002 op Rietfontein begin werk en sy aanvanklike landboukennis opgedoen deur met groente en vee te boer.
Hy het slegs ses jaar gelede na vrugteverbouing geskuif, maar homself binne ’n kort tydjie meesterlik onderskei. Pieters maak gebruik van alle opleidingsgeleenthede wat aan hom gebied word, wat hy dan met passie en ywer terugploeg in die gemeenskap.
Die Vergelegen-boerdery van Robertson het die Nuweling-eerbewys ontvang.
Vergelegen het bewys wat gedoen kan word wanneer begunstigdes van grondhervorming ernstig is oor sake en die regte vennootskappe het.
Daar is sewe trusts met aandele in die maatskappy en hulle wil teen 2020 altesame 100 ha tafeldruiwe lewer en die pakhuis uit te brei om jaarliks 500 000 kartonhouers te kan hanteer.
Mnr. Buks Nel, kultivarkenner van Tru-Cape, het die Innovasieprys ontvang vir sy tegniese bydrae, entomologiese bedryfskennis en sy passie vir vrugtekultivars. Nel het Bigbucks, die kultivarkloon in die Gala-appelfamilie, ontdek. Mnr. Jan le Roux van die Le Roux-groep, Paarl, het die Voorloper-eerbewys ontvang vir sy leiersrol in die landbou. Hy het hy in verskeie komitees en rade gedien en het ’n belangrike rol tydens die deregulering van die landbou in die laat 1990’s gespeel. Die Le Roux-groep bied tans werk aan meer as 4 000 heeltydse en seisoenale werkers. Me. Samantha van den Berg
het die Izethelo-eerbewys vir landboujoernalistiek ontvang.
Mnr. Richard Hurndall, na-oesprogrambestuurder by Hortgro, is met Hortgro se Voorsittersprys vereer vir sy besonderse bydrae tot die sagtevrugtebedryf oor 35 jaar. Hy is ’n tegniese kenner wat instrumenteel was in die toepassing van tegnologiese ontwikkeling veral in die uitvoermark.