Klimaat: El Niño se tande getrek
DIE goeie reën wat verlede naweek wyd oor die somergraangebied geval het, is dalk ’n teken dat ’n El Niño-stelsel nie ’n ongunstige uitwerking op dié streek se graanproduksie sal hê nie.
Dié gebiede het van 20 mm tot 100 mm reën gekry.
Mnr. Johan van den Berg, klimatoloog van Santam Landbou, sê ondanks groot onsekerheid die afgelope tyd oor die ontwikkeling van ’n El Niño-stelsel is die afgelope naweek se reën om verskeie redes ’n gunstige sein.
Die reën het baie naby aan die normale reëntyd voorgekom indien die gebied se reënvalpatrone ontleed word. Dit is gunstig vir ’n normale reëntyd.
Dit het oor ’n groot gebied gereën en nie net strepe en kolle nie. Dit is betekenisvol, want dit kan “sagter” toestande tot gevolg hê omdat die lug vogtiger is, plante groen word en transpireer, terwyl minder sand en stof sal voorkom.
Dit kan beteken dat neutrale weerstoestande meer oorheersend is as die uitwerking van die verwagte El Niño-stelsel, ook dat ’n midsomerdroogte op ’n meer normale tyd, van middel Desember tot middel Januarie, kan voorkom.
BELOWEND
Van den Berg sê tropiese vog wat tans gereelder uit Wes-Afrika kom, is ook ’n gunstige teken, want die vog beweeg suid en suidoos oor Angola, Namibië en Botswana na Suid-Afrika. Verder is die ontwikkeling van diep laagdrukstelsels, soos die afgelope reënstelsel, ’n goeie aanduider van die ontwikkeling van soortgelyke stelsels.
Wat veral gunstig is, is dat die afgelope naweek se reën oor die algemeen beter is as wat voorspellings vroeër verlede week aangedui het. “Gewoonlik verswak voorspellings hoe nader dit aan die datum kom, maar hierdie keer het die teenoorgestelde gebeur en dis ’n gunstige teken.”
Swaar reën van tot 150 mm die afgelope twee weke oor groot dele van Oos- en Suid-Australië is ’n gunstige teken vir reënval in Suid-Afrika in die komende somer, sê Van den Berg.
WAG TOT NOVEMBER
Volgens die Australiese Buro vir Meteorologie dui die Enso (El Niño Suidelike Ossillasie)indeks aan dat die kans op ’n El Niño-weerstelsel in die komende somer tot 70% verhoog het. Terselfdertyd het die Indiese Oseaan-dipool (IOD) van neutraal tot positief begin ontwikkel.
“Wanneer die twee stelsels in die lente ontwikkel, verhoog dit die moontlikheid van ’n warm en droë tydperk teen die einde van die jaar,” sê die buro in ’n verklaring. Dié ontwikkeling moet egter tot einde November voortduur om as ’n positiewe IOD beskou te kan word.
Weermodelle dui aan die ontwikkeling van ’n positiewe IOD kan tot einde November voortduur, waarna dit in Desember tot neutraal kan terugkeer.