Gestolde komkommer-en-appelslaai
Gestolde slaaie was hoogmode in die 1980’s en is nou weer in die koskollig. Hierdie weergawe is ’n kombinasie van twee resepte – ’n gestolde appel-en-pekanneutslaai wat my ma altyd gemaak het, en ’n komkommer-en-kaasslaai wat ons dikwels in die koshuis gekry het. So ’n koue gestolde slaai is heerlik met koue vleise en plaasbrood. Omdat hierdie een appel en kruisement bevat, sal ek dit saam met geroosterde lamsvleis of gerookte varkvleis voorsit.
1 houer (230 g) gladde maaskaas 250 ml goeie mayonnaise 60 ml vars suurlemoensap 1 pakkie (80 g) suurlemoenjellie 125 ml kookwater 2 groot komkommers, grof gerasper 4 Granny Smith-appels, geskil, ontkern en grof gerasper 30 ml fyngekapte, vars kruisement 180 ml fyngekapte pekanneute Sout en vars gemaalde swartpeper na smaak
Suurroom, kruisement en ekstra gekapte pekanneute, om te versier
Klits die maaskaas, mayonnaise en suurlemoensap liggies saam tot glad. Meng die jellie en kookwater in ’n afspnderlike bakkie tot die jellie opgelos is. Voeg dit by die maaskaasmengsel en meng goed, tot glad. Voeg die res van die bestanddele by en meng goed. Bespuit ’n geskikte vorm met ’n inhoudsmaat van 2 liter goed met kleefwerende kossproei en spoel liggies uit met yskoue water. Giet die komkommermengsel in die houer en verkoel oornag. Om voor te sit, keer die slaai op ’n mooi opdienbord uit. Verdun ’n paar lepels suurroom met suurlemoensap en skep oor die slaai. Rond af met vars kruisement en gekapte pekanneute. Lewer 12-14 porsies.