OPHEF VAN VERBOD ’N ‘VROEË KERSGESKENK’

DIE Chinese regering se opheffing van ’n verbod op die handel in renoster- en tierprodukte is vir Suid-Afrikaanse renostereienaars soos ’n vroeë Kersgeskenk, sê mnr. Pelham Jones, voorsitter van die Private Renostereienaarsvereniging van Suid-Afrika (PROA).

China het einde verlede maand aangekondig dat die 25 jaar oue verbod op die invoer van tierbene en renosterhorings opgehef word. Die tydskrif National Geographic berig die re- gering het dit duidelik gemaak dat slegs bene en horings wat deur boerderye geproduseer is, ingevoer mag word vir mediese navorsing en die vervaardiging van medisyne.

“Dit verleen ’n groot hupstoot aan ons saak vir internasionale handel, want wanneer ons by die konvensie oor internasionale handel in bedreigde spesies (Cites) aanvoer dat ons renosterhorings volhoubaar kan voorsien, is daar altyd die vraag: ‘Aan wie?’ Nou kan ons sê China is ’n potensiële handelsvennoot,” sê Jones.

Hy voeg by die besluit om handel in produkte van bedreigde spesies goed te keur is ’n baie netelige saak, en dat PROA groot waardering vir China se dapper keuse het. Hy glo egter dit kan sowel die wêreld se renosterbevolking as die Chinese medici tot voordeel strek.

“Plaaslik is daar eintlik nou niks wat ons keer om renosterhoring na China uit te voer nie. Kopers in China moet eenvoudig ’n invoerpermit van hul regering kry,” sê Jones.

KOMMER IN BEWARINGSKRINGE

Die Wêreldnatuurfonds (WWF) het dadelik gewaarsku dat die besluit skuiwergate vir sluikhandel in tier- en renosterprodukte gaan skep, en dat dit bykans onmoontlik gaan wees om te onderskei tussen produkte wat deur boere geproduseer is, en dié van diere wat onwettig gestroop is.

Jones wys egter daarop dat tiere en renosters bedreig is ondanks ’n internasionale handelsverbod wat al sedert 1977 bestaan en die 25 jaar lange invoerverbod na China.

“Solank daar ’n gewillige koper is, sal daar verkopers wees wat bereid is om die produk te voorsien – onwettig of nie.”

Hy sê dit maak nou nie meer sin om onwettige horings of tierbene te koop as jy dit goedkoper op ’n wettige manier kan bekom nie. “Daar is geen risiko dat jy in

geneem kan word nie, en boonop het jy naspeurbaarheid van ’n produk wat nie vervals of nagemaak is nie.”

Jones sê dit beteken nie Suid-Afrika gaan volgende week tonne renosterhorings na China verskeep nie.

“Ons onderwerp ons steeds aan die gesag van ons eie Regering en die land se Departement van Omgewingsake. Ons sal nie net voortgaan sonder hulle toestemming nie en ons weet dit kan nog lank duur, maar ons bly optimisties.”

PROA is tans besig om sy voorlegging vir die wettige handel in renosterhoring vir die Cites-konvensie in 2019 voor te berei. Dit moet voor 25 Desember ingehandig word.

WATVAN LEEUS?

Dit is nie duidelik hoe die opheffing van die verbod op die invoer van tierbene Suid-Afrikaanse leeutelers gaan raak nie. Die nie-regeringsorganisasie Environmental Investigation Agency (EIA) het vroeër in ’n verslag gewaarsku dat leeubene wat van Suid-Afrika uitgevoer word, in China as alternatief vir tierbene gebruik word.

Die Suid-Afrikaanse Departement van Omgewingsake het in Januarie vanjaar die toelaatbare hoeveelheid leeuskelette wat jaarliks uitgevoer mag word verhoog van 800 tot 1 500. Dit is karkasse van leeus wat in aanhouding geteel is. Dr. Paul Funston, senior direkteur van die bewaringsgroep Panthera wat hom toespits op bedreigde katsoorte, het vroeër aan News24 gesê die mark vir leeubene in Asië het nie bestaan voor Suid-Afrika begin het om dit uit te voer nie. Die Suid-Afrikaanse Roofdiervereniging het teen druktyd nog nie op Landbouweekblad se navrae gereageer nie.