Indringerplante suig jaarliks een Jozinidam leeg
DIE ekonomiese skade wat indringerspesies aanrig, beloop miljarde rande, terwyl indringerplantspesies waterafloop verlaag en saam met ander indringerspesies biodiversiteit beperk.
Dit is van die belangrikste bevindings in ’n nuwe statusverslag oor biologiese indringers en hoe dit bestuur moet word.
Indringerplantspesies wat die grootste uitwerking het, is swartwattel, lantana, dennespesies, bloekom, portjackson, rooikrans, Hakea, Prosopis, populier en treurwilger. Dié plante verminder waterafloop met 1 500 miljoen tot 2 500 miljoen kubieke meter per jaar. Dit is gelykstaande aan die kapasiteit van die Jozini-dam in KwaZulu-Natal. Die uitwerking is die grootste op opvanggebiede in die Wes- en Oos-Kaap en KwaZulu-Natal.
As niks aan die toedrag van sake gedoen word nie, kan die afname in waterbronne 2 600 miljoen tot 3 200 miljoen kubieke meter per jaar wees. Dit is dubbel die huidige beramings.
Die verslag, The status of biological invasions and their management in South Africa, meld dat maatreëls om die spesies te bekamp die beste werk waar geintegreerde benaderings gevolg word. Dit sluit in stappe om die inbring van spesies met ’n hoë risiko om indringers te word te voorkom, die vroeë opsporing en uitroeiing van indringerspesies, asook die bestuur van dié spesies wat reeds versprei het.
SLEGS EEN ONDERSKEPPUNT
Die Departement van Omgewingsake het egter net ’n konstante teenwoordigheid by die O.R. Tambo-lughawe, een van 72 amptelike grensposte, om vreemde spesies te onderskep en te voorkom dat hulle die land binnekom.
Die departement doen van tyd tot tyd inspeksies saam met ander departemente, maar daar word hoofsaaklik op grensinspeksies deur die Departement van Landbou, Bosbou en Visserye staatgemaak om te keer dat vreemde spesies die land binnekom.
Indringerplante bedreig ook die produktiwiteit van weiveld en die verslag beraam dat dit veeproduksie op die besmette grond met die helfte kan verminder.
Suid-Afrika het die afgelope paar jaar swaar onder brande deurgeloop. Die slegte nuus is dat indringerplante die struktuur van en hoeveelheid brandbare materiaal wat geproduseer word kan verander en vermeerder, wat die intensiteit van veldbrande kan verhoog en moeiliker maak om in bedwang te bring.
Altesaam 2 034 uitheemse plant- en dierspesies het buite die gebiede waar hulle verbou of aangehou word, gevestig geraak. Die meeste van dié spesies is doelbewus hierheen gebring vir landbou, bosbou, akwakultuur of die troeteldierhandel.