NUWE GESINSBOERDERY-ORGANISASIE HET GRONDKWESSIES IN DIE VISIER
PLANNE is in werking vir ’n nuwe nasionale landbou-organisasie met die klem op gesinsboerderye.
Die besluit om só ’n organisasie te stig, spruit uit ’n onlangse vergadering in Pretoria onder die vaandel van onder meer organisasies wat sedert 2008 in die ad hoc-komitee vir die beskerming van eiendomsreg saamwerk, soos TLU SA, die SA Instituut vir Rasseverhoudings en AfriForum.
’n Komitee is verlede week aangewys om voort te gaan met die stigting daarvan.
Dr. Theo de Jager, sameroeper en voorsitter van die Wêreldboere-organisasie, sê dié organisasie sal veral veg vir markverwante vergoeding; vinnig hulp verleen aan ’n boer in nood weens byvoorbeeld ’n onteieningsbevel, grondbesetting of ’n plaasaanval; en sal die kundigheid van die onderskeie organisasies binne ’n netwerkstruktuur gebruik.
“Die vereniging sal nie sy eie spesialiste hê nie, maar eerder die verskillende organisasies se kundigheid saamgooi. Die klem sal dus wees op gesinsboerderye en nie ook op landboubesighede of bestaansboerderye nie.”
‘HARMONIE’
Hy sê die bedoeling is nie om mee te ding met enige ander organisasie nie, maar om in harmonie te lewe met ander landbouorganisasies, kultuurorganisasies, burgerregtegroepe en stigtings.
“Almal wat binne hierdie waardestruktuur van gesinsboerdery tuis voel, sal welkom wees. Die mikpunt is nie om vir lede van ’n bestaande landbou-unie te sê hier is nou ’n nuwe een, kies tussen ons nie. Die mikpunt is ook nie om swart boere te ontwikkel nie, maar om hulp te verleen aan organisasies wat dit wel doen.”
Dr. Frans Cronjé, uitvoerende direkteur van die instituut, sê sy siening is dat die staatskaping van die landbou, boerdery en grondhervormingsbeleid al ver gevorder het en dat die belange van gesinsboerderye nie goed verteenwoordig word op enige beleidsforum nie.
“Daar is ’n noodsaaklikheid vir ’n organisasie waarby ’n boer kan aansluit met die wete dat die organisasie net sy belange as boer beskerm. Dit moet ’n enkele doel hê en net na die een belangegroep omsien.”
–