GRONDBERADE KRY NÓG MOMENTUM
TWEE Oos-Kaapse boere, mnre. Walter Biggs en Simon Matthews, was só geïnspireer deur Landbouweekblad en Agri SA se grondberaad op Bela-Bela, dat hulle besluit het om hul eie gemeenskapsberaad vir Alexandria en Kenton te reël.
“My doelwit is dat dit so suksesvol moet wees dat ons buurgemeenskappe ook hul eie berade sal reël in die belang van hul eie gemeenskap,” sê Biggs, ’n melkboer van die plaas Oakleaf by Alexandria.
Albei is betrokke is by die mentorskap van jong boere by Alexandria en in die voormalige tuislande.
Die beraad sal egter nie net op die landbou klem lê nie, maar ook op ander aspekte van die gemeenskap, soos opleiding, gemeenskapsontwikkeling, toerisme en entrepreneurskap.
“Die doelstelling van die beraad, genaamd Masimbambane (wat ‘hande vat’ beteken), is om die vordering wat reeds deur verskeie plaaslike inisiatiewe gemaak is, bekend te stel. Ons hoop eensgesinde mense sal aangemoedig word om by te dra tot vaardighede en hulpbronne vir bestaande en toekomstige gemeenskapsprojekte,” sê Biggs.
Al 30 sprekers, buiten Chris Burgess, hoofredakteur van Landbouweekblad, is plaaslik. Hulle sal vertel van hul ervarings met
hul eie projekte in die omgewing.
“Dit is vir ons ’n eer om vir Chris daar te hê, aangesien hy die mens is wat die hele proses aan die gang gesit het.
“As jy dink wat die grondberaad op Bela-Bela vir die landbougemeenskap gedoen het . . . Dit het so baie van ons aangesproor om ons eie te reël, soos wat onlangs by Komga gebeur het. Die Masimbambane-beraad se doel is om gemeenskappe betrokke te kry soos wat die landbou nou regkry met transformasie,” sê Biggs.
Die beraad vind op 27 November by Kenton on Sea naby Alexandria plaas. Kontak Biggs by e-pos walterbiggs@intekom. co.za vir nog inligting.
–