ONGUNSTIGE MARK KNOU TONGAAT HULETT SE WINSTE
DIE suikerreus Tongaat Hulett se aandeelprys het skerp teruggesak ná teleurstellende halfjaarresultate.
Die maatskappy, wat benewens sy suikerbedrywighede ook eiendomsontwikkeling doen, skryf die daling van 64% in sy bedryfswins vir die halfjaar tot einde September toe aan onafgehandelde eiendomstransaksies en ongunstige marktoestande wat sy suikerrietbedrywighede in Suid-Afrika sowel as Mosambiek geknou het.
Die bedryfswins het in die ses maande tot einde September op ’n jaargrondslag van R1,47 miljard tot R530 miljoen ingekrimp.
Die maatskappy wys daarop dat internasionale suikerpryse in dié tydperk met gemiddeld 22% teruggesak het.
Goedkoper ingevoerde suiker het daartoe gelei dat plaaslike suikerpryse ook gedaal het, wat laer winsmarges beteken het. Die goedkoop ingevoerde suiker was veral rampspoedig vir plaaslike kleinboere wat nie meer suiker winsgewend kon produseer teen die lae pryse nie.
Die gesamentlike wins van Tongaat Hulett se suikerbedry- wighede was R1,138 miljard, wat op ’n jaargrondslag 13% laer is.
TARIEFBESKERMING
Die maatskappy sê in ’n verklaring die probleme vir sy suikerbedrywighede kry aandag. “Tongaat Hulett se bestaande suikerrietbedrywighede het die potensiaal om tot 1,60 miljoen ton suiker te produseer,” lui die verklaring.
Die totale suikerproduksie in die 2018-’19-boekjaar word op tussen 1,31 miljoen en 1,35 miljoen ton geskat.
Verhoogde invoertariefbeskerming in sy Suid-Afrikaanse mark kan help om plaaslike verkope weer te normaliseer. Die verbetering sal in die 2019-’20-boekjaar se resultate weerspieël word, sê die groep.
Tongaat Hulett het in die ses maande ’n wesensverlies van R87 miljoen aangeteken teenoor ’n wins van R661 miljoen in die vorige ooreenstemmende tydperk. Die wesensverlies per aandeel was 74c, wat 113% laer is as ’n jaar gelede.
Die maatskappy het nie ’n tussentydse dividend verklaar nie. Teen verlede Maandagmiddag het Tongaat Hulett se aandeelprys reeds 8% swakker vertoon as voor die bekendmaking van sy tussentydse resultate. Die aandeel het tot dusver vanjaar reeds 45% van sy waarde verloor.