Gamtoosboere kry effens meer water

DIE 200 boere wat uit die Kougadam besproei, se waterbeperkings is effens verlig.

Hulle kan nou 40% van hul toegewysde waterkwota kry, pleks van die 20% wat einde Augustus aangekondig is.

Dit volg ná samesprekings tussen die Departement van Waterwese en Sanitasie, die Gamtoos-besproeiingsraad en die Nelson Mandelabaai-munisipaliteit verlede week.

Boere was hoopvol dat goeie reën in September, wat die damvlak van 7% tot die huidige 54% laat styg het, daartoe sou lei dat die departement die waterbeperking sou verlig.

Die gesamentlike vlak van die damme in die Algoa-waterstelsel staan ook op 54%.

Die departement het egter kort ná die reën die watertoekenning verder ingeperk tot net 20% van die gewone kwota.

Die Gamtoos-besproeiingsraad sê in ’n verklaring hoewel die raad en boere dankbaar is vir die marginale verligting, meen hy die departement kon hulle verder tegemoet gekom het.

“Daar is meer water beskikbaar. Die toewysings kon tot 60% verhoog gewees het.

“Maar ons is dankbaar dat die departement, veral sy streeksverteenwoordigers, geveg het om die toewysing tot 40% gelig te kry,” sê mnr. Pierre Joubert, uitvoerende hoof van die besproeiingsraad.

MAATSKAPLIKE TOL

Mnr. Grewar Oosthuizen, Eer- ste Nasionale Bank se landboubestuurder vir die weste van die Oos-Kaap, sê die verligting van die beperkings sal boere in ’n beter posisie plaas om gewasse te plant en meer seisoenswerkers in diens te neem tydens die oestyd.

“Die eerste ding wat gebeur as ’n droogte toeslaan, is dat boere besnoei op groenteproduksie, wat daartoe lei dat produkte uit ander provinsies ‘ingevoer’ word, teen ’n groter koste.

“Dit het ook ’n reuse-impak op seisoenwerkers, met talle broodwinners wat nie werk kry nie,” sê hy.