TWK Agri trots op wenner
Die Nuwe Era- Kommersiële Boer van die Jaar is ’n volwaardige klant en aandeelhouer van TWK Agri en staan reeds ander opkomende boere in sy omgewing by.
Graan SA, Absa en John Deere Financial se Nuwe Era Kommersiële Boer van die Jaar vir 2018 is mnr. Jeremia Makhosini Mathebula. Mathebula is ’n klant van TWK Agri. TWK Agri wens hom van harte geluk met sy eerbewys en is voorwaar trots om deel van sy suksesverhaal te wees.
Die gelukwensing gaan ook aan alle entiteite en individue wat in verskillende hoedanighede tot Mathebula se sukses bygedra het. Dit sluit veral TWK se grootste vennote in die ondernemingsontwikkelingsafdeling in, onder meer die Land Bank, The Jobs Fund en Graanboerontwikkelingsvereniging (GFADA).
Verskeie individue in die verskillende afdelings van TWK het ook op persoonlike vlak bygedra, en elkeen wat ’n verskil gemaak het, verdien ’n klop op die skouer.
ONTWIKKELING
TWK se ondernemingsontwikkelingsafdeling is in 2013 op die been gebring met slegs een personeellid en ’n groot droom. Struikelblokke vir opkomende boere wat vir die eerste keer toegang tot grond gekry het, is geïdentifiseer. Dit het toegang tot finansiering, toegang tot die regte insette op die regte tyd, en toegang tot tegniese vaardigheid ingesluit.
Mathebula is geïdentifiseer as ’n boer wat reeds suksesvol op klein skaal geboer en graan aan TWK gelewer het. Hy is een van die eerste twee boere in die ontwikkelingsprogram.
Sedert 2013 het die afdeling jaarliks gegroei met nuwe boere wat aangesluit het.
Vandag word sowat 40 opkomende boere in die graan, bosbou en veebedryf ondersteun.
VENNOTE
TWK het gou besef dat hy nie die droom sou kon verwesenlik sonder die regte vennote nie. Die Land Bank was die maatskappy se eerste groot vennoot met groothandelfinansiering wat beskikbaar gestel is vir die finansiering van swart opkomende boere teen gunstige bepalings.
Die afdeling se aanvanklike sukses was teen 2015 duidelik. Dit het TWK in daardie stadium in staat gestel om suksesvol aansoek te doen om finansiering van The Jobs Fund, wat die ontwikkelingsprogram ’n wesenlike verdere hupstoot gegee het.
Die GFADA dra die afgelope paar jaar by tot die program deur middel van subsidies aan sekere boere vir die koste van grondregstelling (soos kalk) en oesversekering.
Graan SA lewer ook ’n bydrae tot die program deur die verskaffing van opleiding. Verder dra die goeie verhouding tussen TWK en Graan SA daartoe by dat suksesvolle boere in Graan SA se ontwikkelingsprogram later kan toegang kry tot ’n ontwikkelingsprogram op groter skaal wat tot op kommersiële vlak kan strek.
TWK het in die afgelope paar jaar ’n goeie verhouding opgebou met die provinsiale en plaaslike departement van landelike ontwikkeling en grondhervorming en die departement van landbou. Goeie kommunikasiestrukture met die regte amptenare is vir die maatskappy uiters belangrik.
’n Aantal kommersiële boere is ook vennote tot sekere individuele projekte en staan die projekte by met die formalisering van ooreenkomste, asook die verskaffing van finansiering.
Die verskillende TWKafdelings word as belangrike vennote geag, en toegang tot die spesialiste in elke afdeling word deur die ondernemingsontwikkelingsafdeling gekoördineer. Dit sluit in finansiële dienste (krediet en versekering), handel (insette, soos kunsmis, saad, diesel en meganisasie), graan (bemarking en opberging) en hout (bemarking).
STRUIKELBLOKKE
Die toepassing van so ’n ontwikkelingsprogram is uiteraard nie altyd maanskyn en rose nie. Sedert die aanvang van die program is die boere deur tydperke van uiterste klimaatstoestande, asook baie wisselvallige graanpryse en baie lae marges in die graanbedryf.
Die hindernisse vir opkomende boere is ook uniek. Dit sluit onder meer swak grondgehalte weens grondregstellings wat nagelaat is, uiters basiese, verouderde of gebrekkige meganisasie, gemeenskapsprobleme, swak balansstate en kontantvloeidruk, asook foute weens gebrekkige ervaring.
Selfs met die sorgvuldige keuring van boere wat ondersteun word, moet aanvaar word dat ’n 100%suksessyfer nie behaal sal word nie.
Verskillende vennote bring ook verskillende vereistes en verwagtinge na die program. Dit alles moet bestuur word.
Suksesverhale soos dié van Mathebula dien egter as aansporing vir almal om moed te hou ten spyte van die probleme.
SUKSES
Een van Mathebula se eienskappe wat van die begin af uitgestaan het, is dat hy nie bang is om vrae te vra en inligting te gaan soek nie.
Hy het self by suksesvolle kommersiële boere gaan aanklop en raad ingewin, en hy doen dit vandag steeds.
Benewens sy liefde vir boerdery is Mathebula is ook ’n uitstekende entrepreneur. Dit het ’n groot rol in sy sukses gespeel.
Mathebula het gegroei tot ’n waardevolle klant van TWK, en deur middel van die TWKlojaliteitskema het hy ook ’n aandeelhouer in die TWK Groep geword.
Mathebula staan ook reeds ander opkomende boere in sy omgewing by.
TWK meen Mathebula is ’n groot inspirasie vir ander opkomende boere in die TWKontwikkelingsprogram, asook in die res van SuidAfrika.
NAVRAE: Webwerf: www.twkagri.com; e-pos: twk@twkagri.com; tel. 017 824 1000.