Hommeltuie nuttig vir plaaswerkén veiligheid
Suid-Afrika word lamgelê deur powere dienslewering. Paaie wat in ’n haglike toestand is, gebrekkige mediese dienste en besmette drinkwater is van die probleme waaraan Suid-Afrikaners blootgestel word. Vir boere en plattelanders kan dit ’n groter probleem wees omdat hulle ver van groot dorpe en stede woon, en minder vangnette as stedelinge het.
StratTech verskaf tegnologiese oplossings om veiligheidsrisiko’s te bestuur met behulp van veiligheidstelsels regdeur Suid-Afrika. Die maatskappy vind die beste oplossings en tegnologie om risiko’s doeltreffend te bestuur of uit te skakel.
In die landboubedryf word hommeltuie hoofsaaklik vir boerdery en beveiliging benut. As veiligheidsmaatreëls word heinings geïnspekteer, vee gemonitor, verlore vee opgespoor en indringers waargeneem en opgespoor. Danksy hittewaarneming-nagsigkameras kan hierdie aksies ook snags uitgevoer word.
Vroegtydige waarskuwings maak vroegtydige optrede moontlik. Outonome vlugte verminder blootstelling aan onveilige situasies, soos om in die donker uit te gaan wanneer onraad vermoed word. Die boer kan in die veiligheid van sy huis of voertuig die hommeltuig uitstuur vir waarneming met ’n vasgestelde roete om vanself te volg.
BELEGGING
Stols Boerdery naby Nampopark by Bothaville in die Vrystaat het in ’n DJI Matrice 200-hommeltuig belê vir risikobestuur op die plaas en die insameling van data. Hulle boer hoofsaaklik met mielies, sonneblomme, sojabone, koring en beeste. Die hommeltuig vergemaklik die bestuur van hul beesboerdery, byvoorbeeld wanneer beeste by hekke en drade uitbeweeg en daar onsekerheid bestaan oor die rigting waarin hulle geloop het.
DJI is die wêreldleier in onbemande lugtegnologie. Die Matrice 200-hommeltuig is bekostigbaar, maklik om te gebruik en doelgerig vir luginspeksies en die insameling van data. Die reikafstand is sowat 3,5 km. Omdat dit lig (minder as 7 kg), opvoubaar, kompak, maklik om op te stel (dit kan binne 5 minute aanmekaargesit word en in die lug wees) en ideaal is vir veldbedrywighede (weer- en waterbestand), was dit maklik vir Stols Boerdery om die regte keuse te maak.
HOE WERK DIT?
Die regte hommeltuig en kamerakombinasie is belangrik en hang af van die doel en verwagting daarvan. Die kamera speel die grootste rol. Die Zenmuse XT640 is ’n uitstekende keuse vir waarneming in die donker, en is die beste op die mark. Hierdie hittewaarnemingskamera spoor hittebeelde op deur liggaamshitte waar te neem en kan in stikdonkerte “sien”. Bedags kan die kamera ook mense identifiseer wat tussen bome of onder bosse wegkruip. Dit is radiometries, en die gebruiker kan dit stel vir verskillende temperature en beeldopsies.
’n Stabiele roteeras verseker dat beweging in winderige toestande nie die kamerabeelde sal beïnvloed nie. Die foto’s wat geneem word, is van uitstekende gehalte. Die kamera kyk ook onafhanklik van die hommeltuig rond.
Benewens boerdery word hommeltuie al hoe meer ingespan om gemeenskappe te beveilig deur patrollies vanuit die lug te doen. Tyd is deurslaggewend tydens plaasaanvalle en rooftogte. Hoe vinniger die reaksie, hoe makliker kan misdadigers vasgetrek word. Terreine wat moeilik te voet of per voertuig bereik kan word, kan dus gefynkam word.
STRUIKELBLOKKE
Vermy situasies waartydens ’n hommeltuig se battery tydens ’n soektog pap raak en eers weer gelaai moet word. Met die dubbele battery-opstelling kan die hommeltuig tot 35 minute met ’n gemonteerde kamera vlieg. Met hierdie dubbele batterystelsel met ingeboude batteryverhitters kan die hommeltuig in baie koue toestande vlieg. Dit het ook uitstekende veiligheidsfunksies met hindernisontwykingsensors wat waarsku teen onder meer kragdrade, hoë pale en geboue. Die radiometriese funksie kan vooraf opgestel word om slegs sekere beelde waar te neem, byvoorbeeld menslike beelde met ’n liggaamshitte van 36-39 °C.
OPLEIDING
Dit is die hommeltuigoperateur se verantwoordelikheid om die nodige opleiding te ontvang. Tesame met die aankoop van die hommeltuig sorg StratTech vir die korrekte, professionele opleiding. Benewens hierdie opleiding vereis die vlieg van hommeltuie vir kommersiële doeleindes ook ’n spesifieke lisensie. Dit is egter nie die geval vir persoonlike gebruik nie.
Tree altyd binne die wet op tydens vlugte. Daar mag slegs gevlieg word oor eie eiendom, of waar toestemming verkry is. Die hommeltuig mag nie hoër as 121 m vlieg nie en mag ook geensins obstruksie of gevaar vir enige nabygeleë persone of voorwerpe veroorsaak nie. ’n Mens mag nie binne 50 m van enige geboue, skole, hospitale of openbare ruimtes vlieg nie, en ook nie binne ’n 10 km-radius van enige lughawe nie.