‘MINDER IS MEER’ AS DIT KOM BY DEKGEWASSE
Gras-, peulgewas- en koolgewassaad is die grondslag van ’n wisselboustelsel wat dekgewasse insluit, maar boere moet hulle nie blind staar teen die koste van saad nie.
Daar is dekgewassaad en ’n dekgewasmengsel vir elke gebruik en begroting, meen mnr. Jac o Kellerman, portefeulje bestuurder by die saadmaatskappy Barenbrug. “By plantdigtheid is ons uitgangspunt ‘minder is meer’. Saad móét bekostigbaar wees, anders gaan die boere moeilik die omskakeling van braak gronde na ’n meer volhoubare stelsel met dekgewasse aanvaar.”
Hy meen saadkoste is klein vergeleke met die voordele van dekgewasse. In die noorde, waar dekgewasse dikwels braak lande vervang, dra voortdurende wortelontwikkeling by tot ’n toename in organiese materiaal in die grond en grondverbetering met natuurlike gronddeurlugting, stikstofbinding en ondergrondse kos vir mikrobes. Kellerman sê die mees ekonomiese stelsel is wanneer diere ingebring kan word om die dekgewasse in vleis of melk om te skakel, die sogenoemde covergraze-model.
Hy sê dis moeilik om ’n prys te koppel aan die bydrae wat dekgewasse kan lewer tot die bekamping van erosie. “Braak lande moet bespuit en bewerk word om dit in stand te hou. Weens wind in veral die sentrale en noordelike dele is daar gronderosie wat gepaardgaan met hierdie model. Ek praat nie eens van bewerkingskoste nie. Hoe duur kan dekgewasse dan nou eintlik wees gegewe al dié voordele?”