DIEANDERSÊ

NÁ net drie dae se bespreking sou die ANC sy meerderheidstem gebruik om aan te beveel dat die Grondwet gewysig word om onteiening sonder vergoeding moontlik te maak, en daarmee is die eerste been van die parlementêre proses vir ’n grondwetwysiging afgehandel. Binne die grondwetlike hersieningskomitee was daar geen ruimte vir die bereik van konsensus of kompromieë nie. Die komitee is ooglopend volgens rassegronde verdeel, met die partye wat die wysiging teenstaan (die DA, Cope en die ACDP) wat meer wit is, en die ANC en EFF, wat dit steun, wat oorwegend swart is.

Die tweede deel van die proses sal later begin wanneer die Parlement komitees saamstel om die wysiging te skryf. Dit sal waarskynlik eers ná die verkiesing in 2019 wees, want parlementêre prosesse kan nie van een parlement na ’n volgende oorgedra word nie.

Opposisiepartye sê die ANC se besluit om deur te druk met die bespreking, sonder behoorlike oorweging van die geskrewe voorleggings, sal hom in die hof duur te staan kom. Nagenoeg 600 000 geskrewe voorleggings is ontvang, waarvan die meeste die besluit teengestaan het. ’n Eksterne maatskappy is aangestel om hierdie voorleggings te verwerk, maar daar is nou verdeeldheid daaroor of dié maatskappy se verslag oor die voorleggings wel aangeneem is. Dit lyk dus of die Parlement die sienings van die publiek nie behoorlik oorweeg het nie.

’n Hofaansoek om die besluit ten gunste van die grondwetwysiging te laat hersien, kan die wysiging aan die Grondwet jare lank laat sloer.