INTERNASIONALE LANDBOUNUUS
1 BRITTANJE | Brexit ‘ ’n ramp’ vir vleisboere
Walliese vleisprodusente het Britse parlementslede gewaarsku dat die bedryf nie volhoubaar sal kan voortbestaan indien Brexit sonder handelsooreenkomste ’n werklikheid word nie.
Nagenoeg ’n derde van die Walliese lamvleisproduksie word jaarliks uitgevoer, en daarvan gaan 90% na die Europese Unie (EU) toe. Indien die Walliese boere volgens die Wêreldhandelsorganisasie se voorwaardes moet handel dryf, sal ’n effektiewe tarief van 46% op lamsvleis en ’n tarief van 48% tot 84% op beesvleis gehef word, na gelang van die snit. Mnr. John Davies, voorsitter van die Walliese boere-unie NFU Cymru, sê sy grootste kommer is dat boere hul marktoegang kan verloor, maar dat die Britse regering in ’n poging om supermarkrakke vol te hou, sal toelaat dat landbouprodukte uit die EU steeds na Brittanje ingevoer word. – Farming UK
2 FRANKRYK | Invoerperke op skadelike landbouprodukte beoog
Die Franse regering het onlangs ’n strategie aangekondig wat daarop gemik is om die invoer van sojabone, palmolie, beesvleis en beesprodukte, kakao, rubber, hout en houtverwante produkte te beperk.
Die strategie is deur vyf Franse staatsdepartemente opgestel en identifiseer die produkte wat die meeste bydra tot “ingevoerde ontbossing” – wat beteken dié produkte word regstreeks of onregstreeks verbind met die agteruitgang van woude.
Die produksie van palmolie, wat in onder meer sjokolade, gebakte goedere, seep en biobrandstof gebruik word, het die meeste van die Maleisiese en Indonesiese reënwoud vernietig, en lei tot habitatvernietiging, menseregtevergrype en klimaatsverandering.
“Europese lande het ’n belangrike verantwoordelikheid, aangesien ’n derde van die ontbossing plaasvind weens die verbruik van landbouprodukte deur lande binne die Europese Unie,” het die Franse regering in ’n verklaring gesê. – Ecowatch
3 AMERIKA | Plaaspryse onder druk
Plaaspryse in die Amerikaanse mieliestreek is tans laer as middel vanjaar, en dié neiging kan voortduur.
Die Chicago Federal Reserve se plaasprysopname, wat middel November uitgereik is, dui op ’n daling van 1% van die tweede tot die derde kwartaal van 2018. Dit was die eerste daling op ’n kwartaalgrondslag vir plaaspryse sedert die vierde kwartaal van 2016.
Byna twee derdes van die landboufinansiers in die deelstate Illinois, Michigan, Iowa, Indiana en Wisconsin verwag die dalende neiging kan voortduur, weens ’n swakker vraag na landbougrond en meer grond wat op die mark beskikbaar is. Die prysdalings is onder meer te wyte aan groter oeste, laer landboukommoditeitspryse en moeiliker finansieringsomstandighede. – Successful Farming