Dié week in die landbou
’N SWARE LAS
Ondanks die welkome R1,45/liter daling in die prys van diesel met ’n swaelinhoud van 0,05% op 5 Desember, is dié brandstof op ’n jaargrondslag steeds R1,72/liter, oftewel 13%, duurder as verlede Desember – R14,67 teenoor R12,95 (binnelandse prys), volgens mnr. Dawie Maree, hoof van landbou-inligting en -bemarking by FNB. Petrol is R1,84/liter goedkoper, en diesel met ’n swaelinhoud van 0,005% is R1,47/liter goedkoper. ’n Liter diesel het in Maart R12,09 gekos en verlede maand R16,12 – ’n styging van R4,03/ liter. Sedert Maart tot verlede maand het die petrolprys van R13,76/liter tot R17,08/liter gestyg. Verlede week se prysdaling is dus amper die helfte van die stygings sedert Maart. Lees meer by bit.ly/2QDw4fA.
KLASAKSIE
’n Klasaksie teen Tiger Brands is verlede week in die hooggeregshof in Johannesburg bekragtig. Dit hou verband met die listeriose-uitbreking wat tot byna 180 sterftes gelei het, en waarvan die oorsprong na twee Enterprise-aanlegte teruggespeur is. Die applikante in die aansoek moet nou aan alle lede van die verskillende klasse eisers kennis gee van die klasaksie. Tiger Brands sê in ’n verklaring op die JSE-nuusdiens sy aanspreeklikheid vir koste in dié verband is hoogstens R1 miljoen, en is “’n gebaar van welwillendheid en sonder enige erkenning van aanspreeklikheid”. Lees meer by bit.ly/2Pmjz32 oor die verloop van die hofsaak.
VLIEGKAMPIOEN
Die Suid-Afrikaanse maatskappy AgriProtein, wat bekend geword het met sy inisiatief om afvalkos in dierevoer te omskep met vlieglarwes, is onlangs ingesluit in ’n nuwe Top50 lys van geniale maatskappye van die tydskrif Time. Die beoordelaars beskou dié maatskappye as ondernemings wat besig is om die toekoms te vorm. Onder die ander ontvangers was bekende multinasionale tegnologiemaatskappye Amazon, Apple en Airbnb. Mnr. Jason Drew, medestigter van AgriProtein, sê in ’n verklaring hulle is “gevlei, maar ons doen inderwaarheid niks nuuts nie”.
JA VIR VRYHANDEL
Die Parlement het verlede week die Afrika Kontinentale Vryhandelgebied (AfCFTA) bekragtig. Dié projek is in 2012 deur die Afrika-unie (AU) van stapel gestuur. Suid-Afrika het die ooreenkoms op 1 Julie verlede jaar onderteken. Tot dusver het 49 lande die ooreenkoms onderteken. Nege ander Afrikalande het reeds bewys van parlementêre bekragtiging by die AU ingedien. Suid-Afrika sal dit waarskynlik in Februarie volgende jaar indien, volgens dr. Rob Davies, Minister van Handel en Nywerheid.
WATER IN ’N SIF
“Die fiskus is nie in ’n posisie om aan te hou om geld in te tap in onproduktiewe bates nie. Dit is soos om water in ’n sif te tap en te hoop dit gaan vol word,” was mnr. Tito Mboweni, Minister van Finansies, se kommentaar op Eskom se versoek vir nóg staatswaarborge. Hy het op die G20-beraad aan Bloomberg TV gesê Eskom moet eerder op die effektemarkte finansiering soek as om aan te hou vra vir staatswaarborge.
LOOPBAANSKUIF
Die Kabinet het kort voor druktyd aangekondig dat mnr. Tshokolo Nchocho, tans uitvoerende hoof van die Land Bank, vanaf 1 Januarie 2019 vir’ n vyfjaar-termyn as uitvoerende hoof van die Nywerheids ontwikkelingskorporasie aangestel is. Sy voorganger, mnr. Geoffrey Qhena, was 13 jaar lank in dié pos.