Uitblinkers
Uitblinkers in die landbou het gewys Suid-Afrikaanse boere is ondanks droogtes en oorstromings, politieke onsekerheid en ’n gedempte ekonomie steeds vernuwend en doeltreffend.
Landbouskrywers SA het op 16 November sy nasionale wenners aangewys. Mnr. Pieter Graaff is die Boer van die Jaar vir 2018. Hy is van die boerdery Witzenberg-eiendomme op die plaas Die Eike in die distrik Ceres. Graaff is Suid-Afrika se grootste appelboer. Hy verbou ook pere, nektariens, kersies, wyndruiwe, groente en graan, bedryf ’n saagmeule en het ’n vee-afdeling.
Mnr. Wandile Sihlobo, landbou-ekonoom by Agbiz, is die Landboukundige van die Jaar.
Mnr. Leonard Mavhungu, ’n melkboer van die Oos-Kaap, is die Nuwe Toetreder tot die Kommersiële Landbou van die Jaar.
NÓG BOERE SKITTER
Mnr. JP van den Berg van Tosca in Noordwes is Agri SA en Toyota SA se Jongboer van die Jaar vir 2018. Van den Berg, ook die hui- dige Moerkweker van die Jaar, verbou aartappelmoere, boer met wild en beeste, en besit ’n hoenderabattoir op Tosca.
Die New Harvest Boer van die Jaar is mnr. Whernit Dirks van die Bergrivierstreek in die Wes-Kaap. Hy boer met koring, weiding, skape en gars.
GRAAN SA SE BESTES
Die broers mnre. Dirkie en Johan van As van die plaas Kinko by Swellendam in die Wes-Kaap is vanjaar Graan SA en Syngenta se Graanboer van die Jaar.
Me. Jenette Thembi Shoba van die distrik Gert Sibande in Mpumalanga is die Bestaansboer van die Jaar.
Mnr. Nhlanhla Sicelo Mngadi van Estcourt in KwaZulu-Natal is die Kleinboer van die Jaar.
Mnr. Paulus Mosia van Edenville in die Vrystaat is die Potensiële Kommersiële Boer van die Jaar, en mnr. Jeremia Makhosini Mathebula van Amersfoort in Mpumalanga is die Nuwe EraKommersiële Boer van die Jaar.
VERSKANSING
Mnr. Johan van Dyk (19) van Brandfort is die wenner van BVG se verskansingskompetisie. Dit wil boere vertroud maak met die gebruik van afgeleide instrumente op die Johannesburgse Sekuriteitebeurs (JSE).
WEEG-EN-WEN
Pioneer se Weeg-en-Wen-wenners het uitstekende gemiddelde opbrengste, gemeet oor ’n gebied van twee hektaar, ingeskryf.
Mielies
■ Besproeiingsmielies: Mnr. Zirk Scheepers van die Wonderkop-boerdery by Cradock het 20,72 t/ha behaal met die mieliebaster DKC 62-80 BR.
■ Droëlandmielies in die westelike produksiestreek: Mnr. Dawie Maré van Sannieshof in Noordwes het 10,3 t/ha gestroop met PAN 5A-291.
■ Oostelike produksiestreek: Mnr. Gerlu Roos van Leeubank by Wonderfontein het ’n opbrengs van 15,373 t/ha met DKC 68-50 behaal.
■ Oos-Vrystaatse produksiestreek: Mnr. Gerrie Claasen van die distrik Bethlehem se wenopbrengs was 13,5330 t/ha met P2137 B.
■ Sentrale produksiestreek: Mnr. Bernard Rabé van die plaas Barnardsrus by Fochville se wenopbrengs was 11,7440 t/ha met DKC 77-77 BR.
■ KwaZulu-Natal: Mnr. Mark Stein van Hattingspruit het met die baster P1745 ’n wenopbrengs van 15,4 t/ha behaal.
Sojabone
■ Sojabone onder besproeiing: Me. Elize Schutte van Klipdrift naby Potchefstroom het 5,8408 t/ha met die kultivar P64T39 R behaal.
■ Droëlandsojabone in die westelike streek: Mnr. Hernich Fouché van Muiskraal by Potchefstroom het 4,67 t/ha met die kultivar P64T39 R gestroop.
■ Oostelike produksiestreek:
Mnr. Gareth Allen van Middelburg, Mpumalanga, het 5,0483 t/ha met die kultivar DM 5953 R behaal.
■ Oos-Vrystaat: Mnr. Josef van Eeden van Fouriesburg het 4,2033 t/ha met Phb 94Y80R behaal.
■ Sentrale streek: Mnr. Barry van Wyk van die plaas Rietfontein by Fochville het met die kultivar DM 6.8i gewen met ’n opbrengs van 4,4178 t/ha.
Sonneblomme
Mnr. Gerhard Knoetze van die plaas Uitkyk by Wolmaransstad het ’n opbrengs van 3,3727 t/ha met die sonneblombaster Phb 65A70 behaal.