Kabinet keur nuwe voorstel vir onteieningswet goed
KORT op die hakke van die Parlement se mosie dat artikel 25 van die Grondwet gewysig kan word om onteiening van grond sonder vergoeding toe te laat, is ’n nuwe wysiging aan die Onteieningswet ook uitgelek, wat blykbaar reeds deur die Kabinet goedgekeur is.
’n Vorige onteieningswetsontwerp is vroeër vanjaar aan die parlementêre proses onttrek in afwagting van die uitkoms van die grondwetlike hersieningsproses oor onteiening sonder vergoeding.
Volgens die uitgelekte wysigings wat in die hersiene wetsontwerp vervat is, kan dit billik en regverdig wees om geen vergoeding te betaal waar grond onteien word in openbare belang, met inagneming van die relevante omstandighede.
Dit sit die voorwaardes vir sulke onteiening as volg uiteen:
As die grond bewoon of gebruik word deur huurarbeiders, soos gedefinieer in die Wet op Huurarbeiders (Wet 3 van 1996). As die grond slegs vir spekulatiewe doeleindes aangehou word. As die grond deur ’n staatsmaatkappy of staatsinstelling besit word. As die eienaar van die grond dit verlate gelaat het. As die markwaarde van die grond gelyk is aan of minder is as die huidige waarde van die regstreekse staatsbelegging of -subsidie in die aanskaffing en kapitale verbetering van die grond. Dié nuwe wetsontwerp sal nou in die Staatskoerant afgekondig moet word, waarna daar 60 dae toegelaat moet word vir openbare kommentaar.
Daarna moet dit weer deur die relevante portefeuljekomitee bespreek word, voor dit deur die twee huise van die Parlement goedgekeur kan word.
Teen druktyd was dit nog nie duidelik of dit betyds by die Parlement ingedien sal kan word om deur die nodige prosesse te gaan en ingestem te word voor die huidige parlement se termyn in Maart tot ’n einde kom nie.