Beesvleis mik boontoe
’N BLINK toekoms wag op Suid-Afrika se rooivleisbedryf, met ’n verwagting dat dit binne die volgende dekade met sowat 24% sal uitbrei.
Die Buro vir Voedsel- en Landboubeleid (BFAP) skat die beesvleisbedryf sal oor tien jaar groei van sowat 700 000 ton vleis per jaar tot 900 000 ton per jaar.
Rooivleis-uitvoer sal ook na verwagting skerp toeneem, veral na Jordanië, Koeweit, Viëtnam en die Verenigde Arabiese Emirate. Daarby het produsentepryse vir Suid-Afrika se beesboere verlede jaar al met 24% toegeneem, dié van speenkalwers met 65% en skaapvleis met 31%.
Die aanbod van beesvleis is kleiner en die vraag hoog. Mnr. Wessel Lemmer, senior landbouDie
ekonoom van Absa Agribesigheid, sê boere is besig om hul kuddes te herbou en produksie sal na verwagting die volgende drie jaar laer bly. Beesvleispryse behoort gunstig te bly.
VARKVLEIS
Met die varkvleisbedryf het dit rampspoedig gegaan ná Enterprise se poloniefabriek in Polokwane in Maart geïdentifiseer is as die bron van die listeriose-epidemie wat meer as 200 lewens geëis het.
Dié aankondiging het ’n katastrofiese uitwerking op die hele waardeketting gehad. Die prys van varkvleis het getuimel, al was dit veilig vir verbruik.
Tiger Brands het R50 miljoen per maand verloor weens die sluiting van aanlegte, én dit het sowat R356 miljoen gekos om produkte te herroep.
Suid-Afrikaanse Varkvleisprodusente-Organisasie (Savpo) het tussen Maart en Mei R6 miljoen aan promosies bestee in ’n veldtog om verbruik te bevorder.
PLUIMVEE
Benewens die feit dat die pluimveebedryf teen goedkoop ingevoerde hoendervleis moes meeding, moes hy ook die nadelige gevolge van verlede jaar se voëlgriep die hoof bied. Die goedkoop ingevoerde hoendervleis bestaan uit produkte uit die Europese Unie (EU), ’n kwota Amerikaanse hoenderstukke weens die Agoa-ooreenkoms en sedert verlede jaar ál meer gestorte produkte uit Brasilië. Pluimveeboere wat verlede jaar deur die H5N8voëlgriepvirus getref is, was ontevrede oor hoe die staat die
vergoeding vir hul verliese hanteer het. Die Departement Landbou, Bosbou en Visserye het slegs R40 miljoen vir vergoeding beskikbaar gehad, terwyl die bedryf se totale verliese sowat R1,87 miljard beloop.
Wat goedkoop invoer betref, was daar ’n mate van verligting toe ’n beskermende tarief van 35,9% op goedkoop ingevoerde hoenderstukke uit die EU in September afgekondig is.
In November het die Suid-Afrikaanse Pluimveevereniging (SAPV) gevra vir ’n invoertarief van 82% op bevrore hoenderstukke aan die been en beenlose stukke. Die huidige tariewe is onderskeidelik 37% vir stukke aan die been en 12% vir beenlose stukke.
Die SAPV voer aan dat die bedryf byna 20% van die plaaslike landbou se bruto binnelandse produk verteenwoordig, die tweede grootste verbruiker van mielies in die streek is en by verre die grootste gebruiker van sojabone.