KOMPOSSEILE BRING NUWE HOOP IN STRYD TEEN PLASTIEK
Met ál meer druk op verbruikers om na alternatiewe vir plastiek te soek om ’n beter aarde na te laat, het The Really Great Material Company (RGMC) onlangs ’n nuwe produk bekend gestel wat plastiekdeklaagseile in die landbou op plase vervang met alternatiewe, bio-afbreekbare en komposteerbare seile.
Die nuwe gesertifiseerde, bio-afbreekbare seile sal vir die eerste keer op die wynplaas Constantia Glen naby Kaapstad op die proef gestel word.
Dr. Horst Prader, die bestuurder, mnr. Etienne Southey, die plaasbestuurder en
wingerdboukundige, en mnr. Justin van Wyk, wynmaker, sal die werking van die nuwe seile beoordeel.
Volgens Southey is die plaas daartoe verbind om volhoubare en verantwoordelike plaaspraktyke te ontwikkel.
“Die groot voordeel hiervan is dat as die seil nie meer benodig word nie, die boer dit kan laat biogradeer in die grond, of dit kan gebruik om kompos te maak. Dit kom van die natuur en kan weer in die natuur teruggeplaas word,” sê mnr. Andrew Pollock, mede-stigter van RGMC.
Hy sê die produk sal deel vorm van ’n sirkel-ekonomie. “Ons wil wegbeweeg van die huidige lineêre ekonomie wat gegrond is op die vervaardiging en verbruik van nie-bio-afbreekbare produkte wat as afval
gestort word. Dit is die oorsaak van die miljoene tonne plastiek wat seelewe in oseane bedreig.”
Volgens Southey is hy veral beïndruk met die elastisiteit van die seil. “Dit is maklik om die seil op die grond en rondom die jong wingerdlote te plaas, en dit is meer bestand teen sterk wind wat gewoonlik plastiekseile uitrek en breek.”
Anders as gewone landbouplastiek, wat as afvalproduk van petroleumolie gemaak word, word die bio-afbreekbare seil van hernubare bronne soos stysel, sellulose en plantolies gemaak en bevat dit geen poliëtileen of polipropileen nie.
Pollock sê baie plastiekprodukte op die plaas kan deur bio-afbreekbare, komposteerbare produkte vervang word. Dit sluit
onder meer in die klein plastiekbande (ties) wat gebruik word om draadstaanders tussen pale bymekaar te hou om wingerpriële te ondersteun.
RGMC gebruik tans die MATER-BI-hars van Novamont om die produkte in SuidAfrika te maak in konvensionele plastiekproduksiemasjiene.