110 jaar wink vir Senwes
Senwes vier op 15 Mei 2019 sy 110de bestaansjaar. Dié mylpaal is veel meer as net nog ’n dekade in die maats se bestaan. Dit bied ’n geleentheid om terug te kyk op merkwaardige tye in Senwes se ryk geskiedenis en die rol dié maatskappy in die Suid-Afrikaa
Vier-en-twintig boere het in die herfs van 1909 byeengekom om die stigting van ’n koöperasie in die voormalige Wes-Transvaal te bespreek. Op 15 Mei 1909 is De Centraal Westelijke Co-operatieve Landbouw Vereniging gestig.
In 1931 het die koörporatiewe vereniging se graanontvangste die eerste keer die kerf van 1 miljoen sakke bereik. Op 21 April 1936 is Senwes by die Departement van Landbou (in die destydse Unie van Suid-Afrika) as die Sentraal Westelike Koöperatiewe Maatskappy geregistreer. Daar is dikwels na die maatskappy verwys as Sentraalwes of Senwesko.
Daarna het Senwes sy produksielyn met grondbone, veevoer en eetbare olies uitgebrei en saadverwerkingsdienste aan lede begin lewer. Later het Senwes met ’n omvattende graansilobouprogram begin om die losmaathantering van graan te verbeter. ’n Landboukundige en ’n voorligtingsafdeling is by die koöperasie gevoeg, en ’n grondboonsorteerfabriek is by Wesselsbron geopen en ’n kunsmisaanleg op Viljoenskroon.
NUWE BEGIN
In 1997 het Senwes van ’n landboukoöperasie omgeskakel na ’n maatskappy wat op die vrye mark meeding. Dié transformasie vanaf die koöperasiewese tot maatskappygerigtheid is gerugsteun deur ’n omkeer-en-groeistrategie waar die klem teruggeskuif het na insetverskaffing en marktoegang. Dié strategie het tydens die maatskappy se eeufeesviering in 2009 ’n rekordwins verwesenlik, naamlik R368 miljoen ná belasting.
In mnr. Danie Minnaar, voorsitter van die Senwes-direksie, se eerste voorsittersbrief aan belanghebbendes beklemtoon hy die maatskappy se strategiese ingesteldheid en langtermynfokus wat versinnebeeld word in die afgelope tien jaar se hoogtepunte:
2009-2013
Senwes het in dié tydperk met die Senwes Spinners-kriekettoernooi vir plaasskole en die Senwes-program vir gegradueerdes begin, en het ’n tienjaarstrategie bekend gestel. Nog iets nuuts was die Graintech-projek, wat silo’s toelaat om graan en oliesade teen ’n hoër as die maksimum toelaatbare voginhoud te ontvang sonder enige verhoogde drogingskoste of bedryfsrisiko’s.
Senwes het ook gesamentlike ondernemings met John Deere Implemente, NWK (Certisure) en Afgri (Hinterland) begin. In 2013 het Senwes ’n gespreksforum op Nampo begin, wat sedert 2014 as Nasie in Gesprek bekend staan.
2014-2018
Senwes het ’n droogterampfonds vir behoeftige gebiede gestig en die grootste enkele geelmieliekontrak in Suid-Afrika beding, ingevolge waarvan Tradevantage alle plaaslike geel mielies aan Meadow verskaf.
In 2016 het Senwes sy lojaliteitskema, AgriRewards, bekend gestel, asook ’n sonkragstelsel by sy hoofkantoor geïnstalleer.
Verlede jaar het nog ’n hoogtepunt gevolg toe Senwes en Senwesbel op die ZAR X-platform genoteer het. Later is die eerste sonpaneel-energiestelsel by die Hennenman-silo geïnstalleer. ’n Groot herbelegging in die IT-argitektuur is suksesvol voltooi. Senwes Equipment het landboumeganisasietakke in die Oos-Kaap geopen en ’n agentskapsooreenkoms met JCB gesluit.
Ook in 2017 het Senwes Grainlink die grootste someroes in die geskiedenis ontvang. Danksy die versnelde graanhanteringsprojek is die innametempo aansienlik verbeter.
Vanjaar het Senwes Credit ’n gestruktureerde finansieringseenheid gestig wat op pasgemaakte, gespesialiseerde finansieringsprodukte toegespits is.
DIE VOLGENDE EEU
Die maatskappy is oor 110 jaar aangevuur deur die begeerte om die voorste beleggingsvennoot, werkgewer, verskaffer en verspreidingskanaal te wees en ’n betekenisvolle bydrae tot voedselsekerheid in Suid-Afrika te lewer. Senwes bied vernuwende en geïntegreerde oplossings aan boere en ander belanghebbendes, en streef daarna om grense te verskuif in elke segment van die waardeketting.
NAVRAE: Webwerf: www.senwes.co.za